Այսօր Ռուսաստանի արտաքին գործերի նախարար Սերգեյ Լավրովը հայտարարել է, որ Ռուսաստանը չի ընդունելու Լիբիայի առաջնորդ Մուամար Քադաֆիին նրա հրաժարականի դեպքում: «Վերջին հարցին արդեն պատասխան տրվել է՝ այն բացասական է»,- ասել է Լավրովը՝ պատասխանելով այն հարցին, թե հնարավո՞ր է Քադաֆիի ժամանումը Ռուսաստան՝ իշխանությունից հրաժարվելու դեպքում:
Քադաֆիի՝ Ռուսաստան մեկնելու տեղեկությունը հայտնվել էր ամերիկյան հեղինակավոր Foreign Policy ամսագրում, որում հեղինակը պնդում էր, որ Քադաֆիի համար ապաստան է պատրաստվել Սև ծովի ափին:
Լավրովը նաև ասել է, որ Ռուսաստանը ճանաչում է Լիբիայի ընդդիմադիր Ազգային խորհուրդը, սակայն ոչ որպես միակ օրինական կառույց: «Ինչ վերաբերում է անցումային ազգային խորհրդին՝ բանն այն է, թե ինչ իմաստ է դրվում «ճանաչել» ասելով: Եթե խոսքը գնում է ազգային անցումային խորհրդի ճանաչման վերաբերյալ՝ որպես բանակցությունների կողմի, ապա անկասկած ազգային խորհուրդը համարվում է այդպիսին, այդ թվում՝ նաև մեր աչքերում»,- ասել է ՌԴ արտգործնախարարը: