Առողջապահության համաշխարհային կազմակերպության (ԱՀԿ) գլխավոր տնօրեն Թեդրոս Ադանոմ Գեբրեյեսուսը երկրներին կոչ Է արել ձեռնպահ մնալ այնպիսի միջոցառումներից, որոնք առանց պատշաճ հիմքերի Չինաստան ուղևորությունները և այդ երկրի հետ առևտուրը սահմանափակում են 2019-nCoV կորոնավիրուսի բռնկման պատճառով:
Փետրվարի 3-ին Ժնևում ելույթ ունենալով ԱՀԿ-ի գործադիր կոմիտեի 146-րդ նստաշրջանում, նա նշել է, որ կորոնավիրուսի դեմ պայքարում ՉԺՀ-ի գործողությունները թույլ են տվել դանդաղեցնել դրա տարածումն աշխարհում: ԱՀԿ-ի ղեկավարի խոսքով՝ անհրաժեշտություն չկա «անհարկի միջամտել ճանապարհորդություններին ու առևտրին»:
Գլխավոր տնօրենն ընդգծել է, որ Չինաստանի ջանքերի շնորհիվ հիվանդության դեպքերի թիվն այդ երկրի սահմաններից դուրս մեծ չէ, և հիվանդությունը տարածվում է «նվազագույն չափով ու դանդաղորեն»: Ներկայում հիվանդության 151 դեպք է գրանցված 23 երկրում: Նա կոչ է արել պայքարել կորոնավիրուսի բռնկման կապակցությամբ ստահոդ լուրերի ու չստուգված տեղեկատվության տարածման դեմ, հաղորդել է ՏԱՍՍ-ը:
