ԱՄՆ-ի նախագահ Դոնալդ Թրամփի վարչակազմը մտադիր է իրանական միջուկային ծրագրի վերաբերյալ պատժամիջոցների բացառությունները երկարաձգել 60 օրով: Հունվարի 29-ին այդ մասին հայտնել է Bloomberg գործակալությունը՝ վկայակոչելով երկու աղբյուր՝ տեղեկացնում է TASS-ը:
Գործակալության տվյալներով՝ բացառությունների երկարաձգումը թույլ կտա Իրանում կատարելու միջուկային էներգետիկայի խաղաղ օգտագործման սահմանափակ աշխատանք: Նշվում է, որ խոսքը վերաբերում է այն դրույթներին, որոնք Ռուսաստանին, Չինաստանին և Մեծ Բրիտանիային թույլ են տալիս Իրանի հետ համագործակցել այդ ոլորտում: Որոշումն ընդունվել է ԱՄՆ-ի ֆինանսների նախարար Սթիվեն Մնուչինի, որը հանդես էր գալիս բացառությունների ժամանակաշրջանի երկարաձգման օգտին, և դրանց դադարեցման ջատագով, ԱՄՆ պետքարտուղար Մայքլ Փոմպեոյի միջև տարաձայնությոնների ֆոնին: Դրա հետ մեկտեղ ԱՄՆ-ը մտադիր է հայտարարել Իրանի Ատոմային էներգիայի կազմակերպության և դրա ղեկավար Ալի Աքբար Սալեհիի նկատմամբ նոր սահմանափակումների մասին: