Թուրքական Milliyet թերթի փոխանցմամբ՝ պաշտոնական այցով Ստամբուլում գտնվող ԱՄՆ պետքարտուղար Հիլարի Քլինթոնը ցանկություն է հայտնել հանդիպումներ ունենալու Թուրքիայի Ազգային մեծ ժողովում (ԹԱՄԺ) ներկայացված քաղաքական ուժերի առաջնորդների հետ։
Սակայն «Ազգայնական շարժում» կուսակցության (ԱՇԿ) առաջնորդ Դևլեթ Բահչելին հրաժարվել է Քլինթոնի հետ հանդիպում ունենալուց։ Դա համաշխարհային բազմաթիվ լրատվամիջոցներ Քլինթոնի համար որակել են որպես «սառը ցնցուղ»։
Իր թուրքական այցի շրջանակներում Քլինթոնը հանդիպումներ է ունեցել Թուրքիայի վարչապետ Ռեջեփ Թայյիփ Էրդողանի, արտգործնախարար Ահմեդ Դավութօղլուի, գլխավոր ընդդիմադիր ուժ հանդիսացող «Ժողովրդա-հանրապետական» կուսակցության (ԺՀԿ) նախագահ Քեմալ Քըլըչդարօղլուի, քրդական «Խաղաղություն ու ժողովրդավարություն» կուսակցության (ԽԺԿ) խմբակցության ղեկավար Սելահաթթին Դեմիրթաշի հետ։
Ի դեպ, Էրդողանն ու Քլինթոնը դռնփակ հանդիպում են ունեցել և որոշ տվյալներով քննարկել են Թուրքիայում ահաբեկչական հռչակված ու «Քրդստանի աշխատավորական» կուսակցության (PKK) դեմ պայքարը, ինչպես նաև Սիրիայում ու Լիբիայում տիրող իրավիճակը։
Հիշեցնենք, որ վերջին շրջանում թուրք ազգայնականները մեծապես դժգոհ են ԱՄՆ-ի տարածաշրջանային քաղաքականությունից՝ նշելով. «ԱՄՆ-ը Սևրի պայմանագրից (1920 թվականի օգոստոսի 10) շուրջ 90 տարի անց ողջ ուժով լծվել է «Մեծ Քրդստանի» պլանի կենսագործմանը: ԱՄՆ-ը դա սկսեց Իրաքի մասնատումից, այժմ եկել է Սիրիայի մասնատման ժամանակը: ԱՄՆ-ը սկսել է ուժեղ ճնշում գործադրել Դամասկոսի վարչակարգի տապալման համար: Հաջորդ զոհերն են լինելու Թուրքիան ու Իրանը:
ԱՄՆ-ը արդեն իսկ քրդական խամաճիկային պետություն է ստեղծել Իրաքի հյուսիսային հատվածում (6 միլիոն քուրդ) և մնացել է քրդական ամբողջական պետության ստեղծման համար տարածքներ խլել քրդական ստվար բնակչություն ունեցող մյուս երեք երկրներից` Սիրիայից (1.4 միլիոն քուրդ), Թուրքիայից (15 միլիոն քուրդ) ու Իրանից (7 միլիոն քուրդ):
Սիրիայի հետ հաշիվները վերջացնելուց հետո ԱՄՆ հայացքը գամվելու է Թուրքիայի ու Իրանի վրա»։
