Վրաստանում 15-ամյա Լուկա Սիրաձեի ինքնասպանության գործով կալանավորվել է Դիդուբե-Չուգուրեթիայի ոստիկանական վարչության քննիչ Մարինա Չոլոյանը: Ինքնասպանությանը նախորդել է հարցաքննությունը ոստիկանության բաժանմունքում: Քննության վարկածով, հենց նա է գիշերը ներթափանցել իր նախկին դպրոց՝ «Կանաչ դպրոց», որտեղ և ուսուցչանոցի և դասասենյակների պատերին հայհոյանքներ է գրել: Դեռահասի ծնողների հայտարարությամբ, նրա վրա ճնշում է գործադրվել խուլիգանական արարք խոստովանելու համար և սպառնացել են, որ եղբոր համար խնդիրներ կստեղծեն: Մինչդեռ ՆԳՆ-ում հայտնել են, որ դեռահասի վրա որևէ ճնշում չի գործադրվել:
Մարինա Չոլոյանը եղել է «Կանաչ դպրոցում» տեղի ունեցած միջադեպի հետ կապված գործի քննիչը: Կալանավորման ընթացքում նրա ինքնազգացողությունը վատացել է և նրան Պետական տեսչության ծառայության շենքից տեղափոխել են հիվանդանոց: Վրաստանի քրեական օրենսգրքի «ինքնասպանության հասցնելու» հոդվածը նախատեսում է 2-4 տարվա ազատազրկում:
Ի դեպ, դեռահասի ինքնասպանության հետ կապված նախօրեին բողոքի ցույցեր են տեղի ունեցել Թբիլիսիում և Վրաստանի մյուս խոշոր քաղաքներում՝ Գորիում, Զուգդիդիում, Բաթումիում և Քութաիսիում:
Հիշեցնենք, որ դեկտեմբերի 12-ին 15-ամյա Լուկա Սիրաձեն ընկել է իններորդ հարկից: Նրան չի հաջողվել փրկել:
https://www.facebook.com/Shecvale/photos/a.104893997579881/166342578101689/?type=3