«Պրեսսինգ» հաղորդման ժամանակ ֆուտբոլի ֆեդերացիայի նախկին նախագահ, ԱԺ նախկին պատգամավոր Ռուբեն Հայրապետյանի հարցազրույցն իրավամբ սկանդալային ստացվեց ու խնդիրն ամենևին էլ այն չէ, որ Նեմեց Ռուբո անունով օլիգարխն աստվածացնում էր Սերժ Սարգսյանին կամ իրեն քաղհալածյալ էր ներկայացնում։ Ավելի մեծ «արջի ծառայություն» Սարգսյանին հնարավոր չէր պատկերացնել, որովհետև եթե քրեական հետագիծ ունեցող մարդն իրեն նույնացնում է երրորդ նախագահի հետ, ապա նույնիսկ վերջինիս հանդեպ լոյալ տրամադրված շերտերը ստիպված են արձանագրել, որ ՀՀԿ առաջնորդին առաջադրված մեղադրանքը չունի որևէ քաղաքական բաղադրիչ ու բացառապես կոռուպցիայի, թալանի մասին է։
Երեկ Հայրապետյանի ամենասկանդալային հայտարարությունը վերաբերում էր ԱԺ պաշտպանության հանձնաժողովի նախագահ Անդրանիկ Քոչարյանին, որի հետ Հայրապետյանը տարիներ շարունակ ընկերություն է արել ու այդ փաստը հասանելի է, համենայն դեպս, բոլոր այն մարդկանց, որոնք ակտիվորեն զբաղվել են քաղաքականությամբ։
Ազգային ժողովի «Իմ քայլը» խմբակցության պատգամավոր, իմ նախկին ընկեր Անդրանիկ Քոչարյանը 10 օր առաջ հորդորում էր իմ ընկերներից մեկի միջոցով, որ ես փախնեմ Հայաստանից, որովհետև Նիկոլը հրաման է տվել՝ ինձ բռնեն․ երեկ երեկոյան ասել է Ռուբեն Հայրապետյանը՝ անդրադառնալով ոստիկանության 6-րդ վարչության կողմից իր տունը խուզարկելու դեպքին:
Քոչարյանին պաշտպանելու մտադրություն ամենևին չունենք, սակայն եթե նույնիսկ ընդունենք այն փաստը, որ Հայրապետյանը չի ստում, ապա ստացվում է՝ նա հրապարակավ ուրացավ այն մարդուն, որն, ըստ նրա, ցանկացել էր օգնել իրեն։ Իհարկե, դա ամենևին չի արդարացնում Անդրանիկ Քոչարյանին, որը, տեսականորեն ընդունենք, քաղաքական ու պետական օրակարգը ստորադասել է «աղ ու հացի» կատեգորիային, սակայն այս դրվագով ավելի շատ բացահայտվում է Ռուբեն Հայրապետյանի դեմքը, որը պատրաստ է անգամ աննշան վտանգի դեպքում «փուռը տալ» իր ընկերներին։
Մյուս կողմից՝ շատ հնարավոր է, որ Քոչարյանի հետ կապված այս պատմությունը հորինվածք է ու այս դեպքում՝ Հայրապետյանը «Իմ քայլի» պատգամավորին թիրախավորում է համակարգված՝ նախկին համակարգի անունից։ Իսկ նախկին համակարգը Քոչարյանին չսիրելու պատճառներ, մեղմ ասած, ունի, եթե հաշվի առնենք այն հանգամանքը, որ վերջինս անուրանալի դեր ունի Մարտի 1-ի բացահայտման գործում։
Նեմեց Ռուբոյի երեկվա հարցազրույցը նաև «ինքնախոստովանական ցուցմունք» էր, որի միջոցով նա բացահայտեց, թե ինչպիսի ստվերային մեխանիզմներով է փորձում միջամտել ՀՖՖ նախագահի ընտրություններին՝ անթաքույց ցույց տալով, որ Թովմաս Գրիգորյանի թեկնածության հետևում հենց իր «ականջներն» են։
Տխուր է պատկերացնել, որ հին համակարգը մնացել է Ռուբեն Հայրապետյանի «տիտանական մտքի» ու «հարուստ» բառապաշարի վրա։ Նրա հարցազրույցը կարելի է տասնյակ անգամներ ցուցադրել՝ առանց լրացուցիչ մեկնաբանությունների հիմնավորելով, թե ինչու պետք է մեկընդմիշտ մերժվեն նախկինները։