Մամուլում օրերս տեղեկություն էր հրապարակվել այն մասին, որ դեռևս օգոստոսին ՌԴ ներքին գործերի նախարարությունը դիմել է ՀՀ պետական եկամուտների կոմիտեին՝ պահանջելով Հայաստանում դադարեցնել հանրահայտ ընկերությանը պատկանող «Пять озер» և «Белая березка» ապրանքային նշաններով օղիների արտադրությունը։ Դրանք արտադրվում են «Ալկո Իմպորտ Էքսպորտ» ՍՊԸ-ի կողմից։ Նշվել էր նաև, որ նշված իրավախախտումը ոչ թե վարչական իրավախախտում է, որի համար պետք է տուգանքներ սահմանվեն վարչական մարմինների կողմից, այլ ՀՀ քրեական օրենսգրքի 207 հոդվածով (կեղծ գինի կամ կեղծ օղի կամ ալկոհոլային կեղծ այլ խմիչք իրացման նպատակով պատրաստելը կամ իրացնելը, որի համար ենթարկվում են նվազագույնը 1-3 տարի ազատազրկման) պետք է պատիժ կիրառվի։
Ինչպե՞ս է արձագանքել Պետական եկամուտների կոմիտեն ՌԴ ներքին գործերի նախարարության դիմումին։
ՊԵԿ-ի մամուլի խոսնակ Լուսինե Մկրտչյանը, արձագանքելով մեր հարցին, ուղարկեց հետևյալ պատասխանը. «ՀՀ պետական եկամուտների կոմիտեի հետաքննության և օպերատիվ հետախուզության վարչության թիվ 8 բաժին է ստացվել Ռուսաստանի Դաշնության ներքին գործերի նախարարության գրությունը՝ «Օմսկվինպրոմ» ՍՊ ընկերության տնօրենի դիմումն ու կից նյութերն առ այն, որ «Ալկո Իմպորտ Էքսպորտ» ՍՊ ընկերության կողմից Հայաստանի Հանրապետությունում խախտվում են «Օմսկվինպրոմ» ՍՊ ընկերության հեղինակային իրավունքները, մասնավորապես՝ «Ալկո Իմպորտ Էքսպորտ» ՍՊ ընկերության կողմից արտադրվում և իրացվում են «Օմսկվինպրոմ» ՍՊ ընկերությանը պատկանող «Պյատ Օզեր» և «Բելայա Բերյոզկա» ապրանքային նշաններով օղիներին մոլորեցնելու չափ նմանվող օղիներ:
ՊԵԿ հետաքննության և օպերատիվ-հետախուզության վարչության թիվ 8 բաժնի աշխատակիցների կողմից իրականացված օպերատիվ-հետախուզական միջոցառումների ընթացքում պարզվել է, որ «Ալկո Իմպորտ Էքսպորտ» ՍՊ ընկերությունն իրականում երկրորդային շուկայից ձեռք բերելով «Օմսկվինպրոմ» ՍՊ ընկերության կողմից արտադրվող «Պյատ Օզեր» և «Բելայա Բերյոզկա» օղիների տարաները (շշերը)՝ դրանք շշալցրել է իրենց կողմից արտադրված օղիներով, այնուհետև շշերի վրա փակցվել են ակցիզային դրոշմանիշներ՝ «Տեղական» նշագրումով և հայաֆիկացման համար նախատեսված ինքնակպչուն թերթիկներ՝ «Ալկո Իմպորտ Էքսպորտ» ՍՊ ընկերության կողմից արտադրված լինելու վերաբերյալ նշումով, որից հետո իրացվել են։
Օպերատիվ-հետախուզական միջոցառումների ընթացքում «Ալկո Իմպորտ Էքսպորտ» ՍՊ ընկերության կողմից նման ապրանքային նշաններով օղիներ շշալցնելու և իրացնելու հանգամանքը հաստատվել է ինչպես գնորդ անհատ ձեռնարկատերերի հայտարարություններով, այնպես էլ «Ալկո Իմպորտ Էքսպորտ» ՍՊ ընկերության կողմից տրամադրված տեղեկանքով։
Նկատի ունենալով, որ ՕՀ միջոցառումների ընթացքում ստացված նյութերն առերևույթ պարունակել են «Տնտեսական մրցակցության պաշտպանության մասին» ՀՀ օրենքի 12-րդ հոդվածի խախտումներ, ուստի դրանք 26.07.2019 թվականին ուղարկվել են ՀՀ Տնտեսական մրցակցության պաշտպանության պետական հանձնաժողով։
ՏՄՊՊ հանձնաժողովի կողմից հիշյալի կապակցությամբ 2019 թվականի օգոստոսի 9-ին որոշում է կայացվել վարչական վարույթ հարուցելու մասին, որի արդյունքում հանձնաժողովի 22.10.2019 թվականի թիվ 143-Ա որոշմամբ «Ալկո Իմպորտ Էքսպորտ» ՍՊ ընկերության նկատմամբ նշանակվել է 16.207.000 ՀՀ դրամ տուգանք՝ անբարեխիղճ մրցակցության գործողության համար»։