Ֆիլիպինների Պամպանգա նահանգում մի խումբ կրոնական մոլեռանդներ Չարչարանաց ուրբաթ օրը ի հիշատակ Գողգոթայում Հիսուս Քրիստոսի զոհաբերության՝ ավանդական ծիսակարգ են իրականացրել, որը ներկայացնում է Փրկչի խաչելությունը: Այս մասին հայտնում է բրիտանական The Guardian թերթը:
Կազմակերպիչների խոսքով՝ այս տարի բեմադրությանը 9 տղամարդ է մասնակցել: Նրանց ձեռքերն ու ոտքերը խաչերին են մեխել հին հռոմեացի զինվորների հագուստներով դերասաններ: Բեմադրության համար օգտագործվել են 7,6 սմ երկարությամբ պողպատե մեխեր:
Ծիսակարգը, որն ամեն տարի Ֆիլիպիններում կատարվում է առանց Կաթոլիկ եկեղեցու ղեկավարության թույլտվության, տևում է մի քանի րոպե:
«Աստվածահաճո է, երբ դու որևէ բան ես անում մարդկանց նկատմամբ սիրուց դրդված: Իսկ երբ մասնակցում ես արյունոտ ծիսակարգերի՝ փառավորվելու համար, դա արդեն հոգևոր ունայնություն է»,- մեկնաբանել է ծեսը արքեպիսկոպոս Սոկրատես Վիլյախեսը:
Այս մասին այլ հոգևորականներ ևս խոսել են: «Ինքդ քեզ սուր ցավ պատճառելու փոխարեն՝ ավելի լավ է կենդանի հավատ փնտրել»,- ասել են հոգևորականները, որոնք հավատացյալներին ամեն տարի համոզում են հրաժարվել այդ ծեսից:
Միևնույն ժամանակ, երկրի իրավապահ մարմինները մի քանի տարի առաջ պահանջել են, որպեսզի «խաչելության թեկնածուները» պարտադիր կարկամախտի դեմ պատվաստվելու վերաբերյալ փաստաթղթեր ներկայացնեն: