Եվրոպական հանձնաժողովի նախագահ Ժոզե Մանուել Բառոզուն դեմ է արտահայտվել ռուսական գազի դիմաց Ուկրաինայի կողմից կանխավճար տալու գաղափարին՝ որպես այդպիսին, ինչը կարող է բացասաբար անդրադառնալ Ուկրաինայի տարածքով Եվրոպա ռուսական գազի փոխադրման անվտանգության վրա, և Ուկրաինայի ու Ռուսաստանի գազային հարաբերությունների մեծ թափանցիկության կոչ է արել, հայտնում է ՈՒՆԻԱՆ-ը:
Այս մասին ասվում է Բառոզուի ուղարկած պատասխան նամակում Ռուսաստանի նախագահ Վլադիմիր Պուտինին, որը ԵՄ անդամ 18 երկրների ղեկավարներին ուղարկած իր նամակում զգուշացրել էր Կիևի հետ գազային հարաբերություններում խնդիրների մասին:
«ԵՄ-ի և Ռուսաստանի միջև համագործակցությունը էներգետիկ ոլորտում հիմնվում է ընդհանուր շահերի վրա… Այս գործում Ռուսաստանի Դաշնության պայմանագրային հուսալիությունը՝ որպես գազի մատակարարի, վտանգված է: Ձեր նամակում Դուք բերում եք Ուկրաինայի «Նավթոգազի» չմարված պարտքերը՝ որպես պատճառ«Գազպրոմի» համար՝ անցնելու կանխավճարի ռեժիմի, որը կարող է վճարի բացակայության դեպքում «Գազպրոմին» դրդել Ուկրաինա գազի մատակարարման մասնակի կամ լրիվ դադարեցման»,- գրում է Բառոզուն:
«Այսպիսի զարգացումը լուրջ անհանգստության պատճառ է, քանի որ այն կհանգեցնի ԵՄ-ին և գործընկեր այլ երկրներին գազի մատակարարման ընդհատումների և կանդրադառնա եկող ձմեռվա համար Ուկրաինայում գազի պահեստավորման վրա։ Ինչ վերաբերում է Եվրոպա մատակարարումներին՝ ուզում եմ հիշեցնել եվրոպական ընկերությունների և «Գազպրոմի» պայմանագրերի մասին: Ուստի «Գազպրոմի» պարտականությունն է համոզվել, որ գազի պայմանավորված ծավալը կմատակարարվի ըստ պայմանագրերի»,- գրել է Բառոզուն:
Բառոզուն հիշեցրել է, որ ԵՄ-ին և Ուկրաինային գազի մատակարարումները սերտորեն միահյուսված են, և նշել է, որ ԵՄ-ն պատրաստ է բոլոր կողմերի հետ քննարկել, թե ինչպես են իրագործվում պայմանագրերը շուկայական գների, միջազգային նորմերի և կանոնների հիման վրա՝ համոզվելու համար, որ փոխադրումն Ուկրաինայի տարածքով, Ուկրաինայի պահեստարաններում գազի պահեստավորումը և Ուկրաինային գազի մատակարարումն իրականացվում են թափանցիկ և հուսալի կերպով:
Անցած շաբաթ Պուտինը նամակներ էր ուղարկել ԵՄ անդամ 18 երկրներին՝ զգուշացնելով Ուկրաինայի գազային պարտքի և Ուկրաինայի տարածքով Եվրոպա գազի մատակարարման հնարավոր խնդիրների մասին:
