«Հեղափոխություն սոցիալական ցանցերի միջոցով» բելառուսական նախաձեռնությունը որոշել է փոխել ակցիաների բովանդակային մասը, և նախկին ծափահարությունների ու բարձր քրքիջի փոխարեն, ամեն չորեքշաբթի որոշել է զարթուցիչներ միացնել բելառուսական քաղաքներում:
Հուլիսի 13-ին կայացել է նմանատիպ մի ակցիա, երբ մի քանի հարյուր մարդ մայրաքաղաք Մինսկում միանգամից միացրել են իրենց հեռախոսների զարթուցիչի զանգը: Ձերբակալվել և բերման է ենթարկվել առնվազն 100 մարդ: Բողոքի ակցիաներ են անցել նաև բելառուսական մյուս խոշոր քաղաքներում:
Ինչպես հաղորդում են բելառուսական լրատվամիջոցները, ձերբակալվածների մեջ քիչ չեն պատահական անցորդները: Օրինակ՝ Գոմել քաղաքում ձերբակալվել է Իտալիայի մի քաղաքացի, որին պատկանում է տեղի ռեստորաններից մեկը: Երեկ նաև հայտնի է դարձել, որ Բելառուսի մանկավարժներին պարտադրում են գնալ բողոքի ակցիաների վայրեր՝ պարզելու՝ արդյոք իրենց դպրոցի աշակերտները նույնպե՞ս մասնակցում են այդ ակցիաներին:
