Սյսօր ԱԺ-ում «Կուսակցությունների մասին սահմանադրական օրենք, առկա խնդիրները և փոփոխությունների շրջանակը» թեմայով քննարկման ժամանակ ԱԺ փոխնախագահ Լենա Նազարյանը խոսեց այն մասին, որ ինքը 2015թ. անձամբ մասնակից լինելով կուսակցության ձևավորման գործընթացին, լավ է պատկերացնում խնդիրները, ըստ այդմ էլ ներկայացրել է իր առաջարկությունները: Բայց մինչ դրանց անցնելը, նա ներկայացրեց իր սկզբունքները: Ասաց.
«Կներեք, բայց ես չեմ հավատում, որ կուսակցությունը, որը չունի ներքին ժողովրդավարության կանոններ և փորձ, ստանձնելով երկրի կառավարումը, կարող է երկիրը առաջնորդել ժողովրդավարության ճանապարհով, որովհետև այդ կուսակցությունը իր ներսում չունի պատկերացում, թե ինչ է ժողովրդավարությունը: Ես չեմ հավատում, որ կուսակցությունները, որոնք մերժում են ներքին ընտրությունների միջոցով ղեկավար կազմի ձևավորումը, երկիրը կառավարելիս կապահովեն ազատ և արդար պայմաններ ընտրությունների համար:
Ես չեմ հավատում, որ այն կուսակցությունները, որոնք չեն դրսևորում կանանց և տղամարդկանց հանդեպ հավասար անխտրական խոսք, կարող է գրեթե հավասարաչափ կանանցից և տղամարդկանցից բաղկացած հասարակության համար հաստատել հավասար իրավունքներ:
Կան հարցեր, որ կուսակցությունները անկախ գաղափարների տարբերությունից, պետք է պարտադրված լինեն հավասար ու ժողովրդավար, և այս հարցերը չպետք է լինեն առանձին ղեկավարների քմահաճության դաշտում, որովհետև կոռումպացված խտրական, ոչ ժողովրդավար կուսակցությունները չպետք է հնարավորություն ունենան քաղաքական դաշտ ձևավորել, կամ, ինչպես տեղի էր ունենում, քաղաքական գործընթացների իմիտացիա անել»: