«Առաջին լրատվական»-ի զրուցակիցն է Արցախի «Միացյալ Հայաստան» կուսակցության նախագահ Վահան Բադասյանը։
– Պարոն Բադասյան, օրերս ՀՀ երկրորդ նախագահ Ռոբերտ Քոչարյանին քաղբանտարկյալ հռչակելու մասին մի հայտարարություն տարածվեց, որին միացել են գործիչներ նաև Արցախից։ Ի՞նչ տեսակետ ունեք այդ հայտարարության մասին և արդյո՞ք կարծում եք, որ նրա անազատության մեջ գտնվելը իսկապես վտանգ է ներկայացնում հայկական երկու պետությունների անվտանգությանը։
– Ես կարծում եմ, որ ճիշտ հակառակն է՝ ազգային անվտանգությունը խաթարվում է, երբ մանավանդ Արցախից աջակցություն են հայտնում։ Ես դա խստիվ դատապարտում եմ, դա քարոզչություն է՝ ուղղված հանցագործությունների պարտակմանը։ Այդ անձինք պետք է պատասխանատվության կանչվեն, ու բոլորս պետք է իմանանք, թե նրանք ՀՀ նախկին իշխանությունների հետ միասին որքանո՞վ են մասնակցել բռնություններին, ընտրությունների կեղծմանը, սպանություններին, հատկապես Մարտի 1-ի ոճրագործության մեջ այդ անձինք որքանո՞վ են ներգրավված եղել։ Կամ եթե միայն սպասարկու են եղել, ըստ իս՝ ավտոմատ կերպով դառնում են հանցակից։ Ես չգիտեմ, թե Արցախից կոնկրետ ովքեր են միացել, այդուհանդերձ կհորդորեի, որ զերծ մնան այդպիսի հայտարարություններից։
– Վիտալի Բալասանյան, Ժաննա Գալստյան։
– Ես կհորդորեի նրանց չանել նման բաներ, որովհետև դա իսկապես ազգային անվտանգության խաթարում է։ Եթե չեն համաձայնում, ես կհրավիրեի բոլոր այդ պաշտպանողներին կլոր սեղանի շուրջ, որտեղ ես իրենց կապացուցեմ, որ հանցագործներին չի կարելի հովանավորել։
– Կարծում եք՝ Քոչարյանը դեռ փորձում է Արցախի որոշ գործիչների օգտագործե՞լ իր ռևանշիստական նպատակների համար։
– Ամեն ինչ կարող է լինել, միայն ռևանշիզմը չէ, արջի ծառայության մատուցման նման մի բան է։ Շատ անձնավորություններ կան, որոնք ուղիղ թելերով շատ հարցերով կապված են Ռոբերտ Քոչարյանի հետ։
– Վիտալի Բալասանյանի վերջին աղմկահարույց հայտարարություններն է՞լ են այդ կոնտեքստի մեջ տեղավորվում։ Նա նախ պահանջում էր ՀՀ վարչապետի հրաժարականը, իսկ հիմա ավելի հեռուն է գնացել՝ ֆիզիկական ոչնչացման սպառնալիք է հնչեցնում։ Ինչպե՞ս կմեկնաբանեք իր այս հայտարարությունները։
– Վիտալի Բալասանյանը մոլորության մեջ է։ Սերժ Սարգսյանը գտնվում էր Ստեփանակերտում և երևի թե ոգի է ներշնչել, ռևանշիզմի հնարավորություններ է հաղորդել նրանց, ու Վ. Բալասանյանն այդպես կոշտ արտահայտվել է։ Ես պարզապես խորհուրդ կտամ բոլորին նման երևույթներին արդեն իսկ հումորով վերաբերվել, համարել անհեթեթ բոցեր։ Իմիջիայլոց, եթե նայեք՝ ֆեյսբուքով բոլորն արդեն հումորով են վերաբերվում։
– Այսինքն՝ մտահոգվելու առիթ չկա՞։
– Իհարկե չկա։ ՀՀ նախկին իշխանությունների քաղաքական մուտքն արդեն փակվել է։ Կհորդորեմ Բալասանյան Վիտալիին ձեռք քաշել այդ մտքից ու լծվել խաղաղ, ստեղծագործ աշխատանքի։