Բրիտանացի գիտնականները Ադոլֆ Հիտլերի կնոջ՝ Եվա Բրաունի ԴՆԹ-ում հրեական արմատներ են հայտնաբերել, հայտնում է The Independent-ը՝ հղում կատարելով փաստագրական ֆիլմին, որը հաջորդ շաբաթ կցուցադրի Channel 4 հեռուստաալիքը:
Ֆիլմը նվիրված է անցյալի հայտնիների ԴՆԹ-ների հետազոտությանը: Եվա Բրաունի ԴՆԹ-ի հետազոտության համար օգտագործվել է 1945-ին վերցված մազի նմուշը:
Հետազոտության արդյունքներով՝ մայրական կողմով Եվա Բրաունը կապ է ունեցել աշքենազի հրեաների հետ: Հայտնաբերվել է N1b1 գեների հաջորդականություն, որն առանց փոփոխությունների փոխանցվում է մայրական կողմով:
Եվա Բրաունը երկար տարիներ եղել է Հիտլերի սիրուհին, հետո՝ քաղաքացիական կինը: Նրանք պաշտոնապես ամուսնացել են 1945-ի ապրիլի 30-ին՝ համատեղ ինքնասպանությունից մի քանի ժամ առաջ:
