Վենետիկի դատարանը 68-ամյա իսպանացի ճարտարապետ Սանտիագո Կալատրավային տուգանել է 78 հազար եվրոյով՝ Grand Canal-ի վրայով անցնող Սահմանադրության կամրջի ոչ ճիշտ նախագծման համար:
Ըստ դատարանի, հաղորդում է BBC-ն, 2008 թ.-ին կառուցված կամրջի նախագծում ի սկզբանե սխալներ են եղել, որոնց պատճառով դրա արժեքը 7 միլիոն եվրոյից աճել է մինչև 11.6 միլիոն եվրոյի:
Դատարանը գտել է, որ կամրջի տարրերը սխալ չափերի են եղել, աստիճանները չափազանց արագ են մաշվել, ինչպես նաև պահանջվել է սայլակների համար նախատեսված թեքահարթակների վերակառուցում:
Կալատրավան բազմաթիվ միջազգային ճարտարապետական մրցանակների դափնեկիր է: Նրա նախագծերից են՝ Մալմեում գտնվող Turning Torso երկնաքերը, Նյու Յորքի Համաշխարհային առևտրի կենտրոնի տրանսպորտային հանգույցը և այլք:
Grand Canal-ը 125 տարվա ընթացքում Վենետիկում կառուցված առաջին կամուրջն է. այն Սանտա Լուչիա կայարանը միացնում է Հռոմի Piazzale-ի հետ:
