Մեծ Բրիտանիայի Գրեյթ Օրմոնդ-Սթրիթ հիվանդանոցի բժիշկները բաժանել են պակիստանցի սերտաճած գլուխներով սիամական երկվորյակներին: Այս բժշկական հաստատության վիրաբույժները արդեն երկու նմանատիպ վիրահատություններ են անցկացրել, սակայն երրորդը ամենաբարդն էր, քանի որ աղջիկների՝ Սաֆայի և Մարվայի գլուխները սերտաճել էին անսովոր S-աձև դիրքով, հաղորդում է BBC-ին:
BBC-ի փոխանցմամբ, երկվորյակների գանգը նման է եղել երկար խողովակի, որի մեջ տեղադրված էին երկու տարբեր ուղեղներ: Միևնույն ժամանակ, յուրաքանչյուր ուղեղի աջ կիսագունդը մխրճված է եղել մյուսի ուղեղի խոռոչի մեջ:
Հղիության պահին երկվորյակների մայրը՝ Զայնաբ Բիբին արդեն յոթ երեխա ուներ: Ծննդաբերությունից երկու ամիս առաջ նրա ամուսինը մահացել է: Կինը երկվորյակներին բաժանելու վիրահատության համաձայնություն է տվել՝ դրա հնարավորության դեպքում:
Վիրաբույժները նշել էին, որ նման վիրահատությունը ցանկալի է իրականացնել մինչև երեխաների մեկ տարեկան դառնալը: Բայց ֆինանսական օգնության հետաձգման պատճառով աղջիկներին հնարավոր եղավ Լոնդոն տեղափոխել միայն 19 ամսականում:
Երեխաների բաժանման վիրահատությանը մոտ հարյուր մարդ է մասնակցել՝ բժիշկներ, բիոինժեներներ, վիրտուալ իրականության դիզայներներ: Վիրաբույժների հիմնական խնդիրն էր բաժանել երկվորյակների անոթների և զարկերակների ընդհանուր բարդ ցանցը: Դրանց վնասումը կարող էր ուղեղի հյուծման և ինսուլտի վտանգի հանգեցնել:
Առաջին վիրահատությունը տևել է 15 ժամ և հաջող է ընթացել. բաժանվել են զարկերակային կապերը: Երկրորդ վիրահատությունը տեղի է ունեցել երկու ամիս անց և տևել է 20 ժամ, բժիշկները պետք է բաժանեին երակները: Այս անգամ վիրահատության ժամանակ արյունահոսություն է սկսվել, որը Սաֆայի մոտ ինսուլտի է հանգեցրել: Աղջիկը ողջ է մնացել, բայց բժիշկները չեն նշում, թե դա ինչպես կանդրադառնա նրա և քրոջ հետագա զարգացման վրա:
Փետրվարին երկվորյակները վերջնականապես բաժանվել են: Բժիշկները յոթ ժամ զրոյից հավաքել են երեխաների գանգը:
«Բաժանումը միայն սկիզբն է: Այժմ թիմը պետք է աղջիկների գանգերին կլոր տեսք տա օգտագործելով նրանց ընդհանուր խողովակի տեսք ունեցող գանգի մնացորդները, այնուհետև լրացուցիչ աճեցված մաշկով փակել այն»,- հաղորդում է պարբերականը:
Չորս ամսվա ընթացքում բժիշկները կարողացել են զգալիորեն բարելավել երեխաների կիսագնդերի խեղաթյուրումը: