Վերջին ամիսներին դժվարացել է ՀՀ քաղաքացների՝ շենգենյան վիզա ստանալու գործընթացը։ Օրերս այս խնդրով ԱԺ «Լուսավոր Հայաստան» խմբակցության պատգամավոր Անի Սամսոնյանը դիմել է ՀՀ արտաքին գործերի նախարարություն՝ պարզելու, թե ինչու է դժվարացել ՀՀ քաղաքացիների համար Շենգենյան վիզա ստանալը։ ԱԳՆ-ից տեղեկացրել են, որ իրենք նույնպես մտահոգ են այս խնդրով։
«Այդ հարցը տարբեր հանդիպումների ժամանակ պարբերաբար բարձրացվել է Հայաստանի ԱԳ նախարարի, փոխնախարարի և հյուպատոսական վարչության պետի կողմից ԵՄ բարձրաստիճան ղեկավարության և ՀՀ-ում հավատարմագրված դեսպանների առջև, նշվել է Հայաստան-ԵՄ հետընդունման համաձայնագրով նախատեսված պարտավորությունները Հայաստանի կողմից պատշաճ կատարելու մասին: Միաժամանակ, հայկական կողմն իր մտահոգությունն է հայտնել ԵՄ գործընկերների կողմից վիզաների դյուրացման համաձայնագրի ոչ պատշաճ կիրարկման առնչությամբ:Հայտնում ենք նաև, որ խնդրո առարկան առաջիկայում Երևանում նախատեսվող Հայաստան-ԵՄ վիզաների դյուրացման համաձայնագրի համատեղ կոմիտեի 5-րդ հանդիպման օրակարգում և կրկին կներկայացվի ԵՄ գործընկերների ուշադրությանը»,-գրված է ԱԳ պատասխանի մեջ։
Հրապարակախոս, քաղաքագետ Անուշ Սեդրակյանը, «Առաջին լրատվական»-ի հետ զրույցում, անդրադառնալով խնդրին, նշեց, որ սա պետք է շատ մտահոգի մեր իշխանությանը երեք պարամետրով․ առաջին՝ սա նշանակում է, որ ճանապարհային քարտեզի, որը օրենքով պետք է մեկնարկի 2020թվականին, բնականոն հունով ընթանալու դեպքում մենք չէինք ունենա միջոցառումների այսպիսի խստացում։ Ըստ քաղաքագետի՝ սա նշանակում է՝ եվրոպական ընտանիքը ունի որոշակի վերապահումներ Հայաստանից գնացող մարդկանց հանդեպ։
Երկրորդ խնդիրը վերապահումների պատճառն է։ Սա, Անուշ Սեդրակյանի խոսքով, նշանակում է, որ ինչ-որ առումով մեր քաղաքացիները համարվում են անհուսալի Եվրոպայի համար, ինչը այդպես չէ, բայց կա խնդիր, որ նրանք մտածում են, որ քաղաքացիները պլանավորում են ոչ օրինական արտագաղթել և մնալ Եվրոպայում։
«Եվ քանի որ մեր իշխանություններն անվերջ պնդում են, որ մեզ մոտ արտագաղթը կրճատվել է և ընդհակառակը, մեծ հայրենադարձություն է, Եվրոպայի այսպիսի միջոցառումները մեզ պետք է զգոնացնեն, քանի որ ակնհայտ է, որ ի տարբերություն մեր հայկական վիճակագրություն, եվրոպական վիճակագրությունը շատ հստակ է և չի շարժվում վիճակագրություն կազմողի նախասիրություններով»,-ասաց քաղաքագետը՝ հավելելով, որ սա նշանակում է, որ ճանապարհային քարտեզը չի գործելու, այլապես կսկսեր գործել հենց այս պահին։