Աշխարհահռչակ Euromaney ամսագիրը 2011 թ. Գերազանցության մրցանակը շնորհել է «Ամերիա» բանկին՝ որպես տարվա լավագույն բանկ Հայաստանում: Մրցանակաբաշխության արարողությունը տեղի է ունեցել հուլիսի 7-ին, Լոնդոնում: Բանկի մանրածախ գործառնությունների գծով տնօրեն Բազրիկ Սեկոյանն այսօր լրագրողների հետ հանդիպման ժամանակ հայտնեց, որ մրցույթին մասնակցել են աշխարհի ավելի քան 100 երկրների բանկեր, բրոքերային և դիլերային ընկերություններ:
Ամսագիրը հաթողին ընտրել է հաշվի առնելով Բանկի արդյունավետ կառավարման համակարգը, տեղական շուկայում ընդլայնվող դիրքերը, նոր ծառայությունների ներդրումը՝ գնման պատվերի ֆինանսավորում, դասական ֆակտորինգ, կառուցվածքային ավանդ, ոսկով մետաղական հաշիվներ, ինչպես նաև առևտրային 2 համակարգի ներդրումը՝ «AMERIA GLOBAL TRADING» (ապահովում է հասանելիություն աշխարհի 19 երկրի 80 խոշորագույն ֆոնդային բորսաներին) և «WEB TRADER» (առևտրային հաշիվը հասանելի է դարձնում աշխարհի ցանկացած կետում): Բ.Սեկոյանի խոսքով, հաշվի են առնվել նաև նախորդ տարի «Կասկադ» բանկի հետ միացման հաջող գործընթացը, միջազգային կառույցներից՝ IFC-ից, DEG-ից, EBRD-ից, 130 մլն դոլարի չափով գումարների ներգրավումը և բարեհաջող տեղաբաշխումը:
«Ամերիա» բանկի զարգացման գծով տնօրեն Տիգրան Ջրբաշյանը ներկայացրեց կիսամյակային ցուցանիշները. ակտիվների ծավալը հասել է 177 մլն դրամի (կիսամյակային աճը՝ 11%, 2011 թ. հունվար-հունիսի աճը, 2010 թ. նույն ժամանակահատվածի նկատմամբ, 46%), պարտավորությունները՝ 145 մլրդ դրամ (տարեկան աճ՝ 60%), ժամկետային դեպոզիտներ՝ 48 մլրդ դրամ (կիսամյակային աճը՝ 12%, տարեկանը՝ 23%), ֆիզիկական անձանց ժամկետային ավանդները՝ 31 մլրդ դրամ (տարեկան աճը 72-73%), վարկային պորտֆելը՝ 115 մլրդ դրամ (կիսամյակային աճը՝ 12%, տարեկանը՝ 58-60%): Բանկի շահույթի մակարդակը մոտ 2 մլրդ դրամ է, տարեկան նախատեսվում է ապահովել 3-3,5 մլրդ դրամ շահույթ:
«Շատ երկրներում ավանդների աճի պատճառը բնակչության ծախսել չցանկանալն է եղել: Մեզ մոտ իրավիճակն արդեն կայունացել է, ավանդների ամսական աճն առնվազն 5-10% է՝ անկախ սեզոնայնությունից: Դա պայմանավորված է նաև բնակչության վստահության աճով»,- ասաց Տ. Ջրբաշյանը:
Նա հայտնեց նաև, որ միջազգային կառույցների հետ ներկայում բանակցություններ են վարվում, և այս տարի նախատեսվում է ևս ավելի քան 50 մլրդ դոլար ներգրավել: Տ. Ջրբաշյանի գնահատականով, տեղական շուկան կարիք ունի ֆինանսական միջոցների. «Եթե ընդհանուր ֆինանսական միջնորդությունը տարեկան աճի 20%-ի չափով, մենք էլի չենք հասնի Արևելյան Եվրոպայի միջին ցուցանիշին: Վարկավորման ծավալների աճն այսօր չի կարող բերել շուկայի գերտաքացման, որովհետև պահանաջարկն իրականում շատ ավելի մեծ է, քան կարողանում ենք ապահովել»:
