Արցախում քաղաքական ակտիվությունը տարբեր հանգամանքներով է պայմանավորված՝ նոր կուսակցությունների առաջացում, հների թարմացում, ինչպես նաև սահմանադրական փոփոխությունների շուրջ ստորագրահավաք: «Առաջին լրատվական»-ի հետ զրույցում այսպիսի կարծիք հայտնեց Արցախի խորհրդարանի «Վերածնունդ» խմբակցության ղեկավար Հայկ Խանումյանը: «Այս բոլոր ուժերը միասին քարոզչություն կամ հակաքարոզչություն են իրականացնում, ինչը օրենքի սահմաններում է, և ստացվում է այսպիսի քաղաքական ակտիվություն»,- հավելեց նա:
Մեր զրուցակցի խոսքով՝ այդ քաղաքական ակտիվության մեջ որևէ վատ բան չկա. «Ընդհակառակը՝ լավ է, երբ հասարակությունը անընդհատ ակտիվ է, լավ է, երբ քաղաքական ուժերը ավելի հաճախ են շփվում հասարակության լայն շերտերի հետ: Հուսամ՝ սա կբերի նաև որոշակի քաղաքական գիտակցության աճի»:
Ինչ վերաբերում է Սամվել Բաբայանի կողմնակիցների՝ անհրաժեշտ քանակով հավաքված ստորագրություններին, Հայկ Խանումյանն ասաց. «Ընթացակարգը տեսականորեն սահմանադրականության շրջանակում է, իսկ երբ օրինագիծը գա հասնի խորհրդարան, և հասնի քվեարկության պահը՝ այդ ժամանակ մենք մեր դիրքորոշումը հստակ կարտահայտենք»:
Դիտարկմանը՝ Սամվել Բաբայանի կողմնակիցների կողմից առկա՞ են փողոցային պայքարի նախադրյալներ, Հայկ Խանումյանը պատասխանեց. «Տեսականորեն դա էլ է հնարավոր, և կարծում եմ՝ քաղաքական առումով այդ հարցը զուտ փակուղի է մտնում, որովհետև խորհրդարանի երկու երրորդը կողմ չի քվեարկի այդ նախագծին: Ենթադրվում է, որ դրանից հետո հնարավոր են նաև փողոցային ակցիաներ»:
Առավել մանրամասն՝ տեսանյութում: