Այսօր՝ հուլիսի 1-ին, Ազգային ժողովում հրավիրվել է արտահերթ նիստ: Այժմ քննարկվում է Բարձրագույն դատական խորհրդի անդամի ընտրության հարցը: «Իմ քայլը» խմբակցությունը այդ պաշտոնում առաջարկել է Աննա Մարգարյանի թեկնածությունը:
«Տեղյա՞կ եք արդյոք, որ ԲԴԽ-ն 2018-ի դեկտեմբերի 21-ին ընդունել է մի որոշում ՀՀ դատավորի էթիկայի կանոնները սահմանելու մասին, այսինքն՝ բարեվարքության ընդհանուր կանոնները հաստատված են եղել, բայց ակնկալել, որ ԲԴԽ-ն կկարողանա իր իսկ հաստատած կանոններին ենթարկեցնել դատավորներին և դատական համակարգի ներկայացուցիչներին՝ միամտություն է: Ի՞նչ եք կարծում՝ ի՞նչ նոր գործիքներով պետք է օժտվի դատական խորհուրդը, որպեսզի վեթինգի գործընթացը անցնցում իրականացվի, և այնտեղ կարևոր տեղ ունենա բարեվարքությունը»,- թեկնածուին հարցրեց «Լուսավոր Հայաստան» խմբակցության պատգամավոր Արման Բաբաջանյանը:
Պատգամավորը նշեց նաև, որ թեկնածուն չխոսեց դատական իշխանության անկախացման բարձրացման մեխանիզմների մասին. «Չենք կարողանում հասկանալ՝ ի՞նչ ոչ ստանդարտ լուծումներ եք այդ ուղղությամբ տեսնում: Ի՞նչ պետք է անել, որ դատարանները երիտասարդների համար դառնան գրավիչ՝ բացի նրանից, որ առաջնային եք դիտարկում աշխատավարձերի բարձրացման հարցերը»:
Արման Բաբաջանյանի խոսքով՝ հանրությունն այն համոզումն ունի, որ դատավորները, ինչ-որ անհայտ պայմանների բերումով, շատ հարուստ են. «Եվ այսօր ԲԴԽ-ին է վիճակված այս հումքի վրա վստահության աստիճան բարձրացնել»:
«Ես ցավում եմ, որ դուք մեր թեկնածուն չեք, մենք վերապահումներ ունենք այդ մասով, բայց ասեմ նաև, որ մենք շատ լուրջ մտահոգություն ունենք ԲԴԽ-ին վեթինգ իրականացնելու պատվիրակման հետ կապված: Մենք օրեր առաջ հրապարակեցինք այն սկզբունքները, որ «Լուսավոր Հայաստանն» է պատկերացնում վեթինգի օրենքի մասին, հետո «Իմ քայլը» մեկ էլ որոշեց, որ վեթինգի մասին օրենք պետք չէ, և վեթինգ իրականացնելու պատվիրակեց երկու մարմիններին: Մինչդեռ հարց է առաջանում՝ իսկ ո՞վ պետք է վեթինգի ենթարկի ԲԴԽ-ին, ովքե՞ր են որոշողները, թե իրենք ինչ բարեվարքություն և ինչ եկամուտներ են հայտարարագրել և այլն: Այս շրջապտույտից դուրս գալու ի՞նչ մեխանիզմներ եք տեսնում»,- Աննա Մարգարյանին հարցրեց Արման Բաբաջանյանը:
Մանրամասները՝ տեսանյութում:
