Հնդկաստանում պատրաստվում են ներկայացնել աշխարհում առաջին զուգարանը, որն աշխատում է արևի էներգիայով: Հեղափոխական հայտնագործությունը կարող է օգնել աշխարհում միլիոնավոր մարդկանց, ովքեր սանիտարական պայմանների բարելավման սուր կարիք ունեն: Այս մասին հայտնում է DNA հնդկական պորտալը:
Նախագծի գլխավոր մշակող, Կոլորադոյի համալսարանի պրոֆեսոր Կառլ Լինդենի խոսքով՝ ինքնավար զուգարանն առանց ջրի հոսքի առկայության կարող է մարդու կենսագործունեության արգասիքները տաքացնել՝ հասցնելով շատ բարձր ջերմաստիճանի, որը բավարար է դրանք մանրէազերծելու համար:
Ստացված բիոածուխը կարելի է կիրառել որպես պարարտանյութ, ինչպես նաև որպես վառելիք՝ նշել է գիտնականը: Նրա խոսքով՝ նախագիծը «Կրկին հայտնագործիր զուգարան» արշավի մաս է: Այն անցկացնում է Բիլ և Մելինդա Գեյթսերի բարեգործական հիմնադրամը:
Թիմն աշխատանքները սկսել էր 2011 թվականից: Սպասվում է, որ հայտնագործությունն ի ցույց կդրվի հանրությանը մարտի 20-22-ը: Միջոցառմանը կմասնակցեն ինժեներներ, գիտնականներ և պաշտոնյաներ:
Հայտնագործությունը կազմված է 8 պարաբոլային հայելիներից: Զուգարանը առայժմ կարող է սպասարկել օրական 4-6 մարդու:
