«Ի պաշտպանություն Վոլոդյա Ավետիսյանի» ցույցի մասնակիցներին հետապնդում են և զգուշացնում, որ այլևս ակցիաներ ու հանրահավքներ չկազմակերպեն: Այսօր լրագրողների հետ հանդիպման ընթացքում այս մասին հայտարարեցին նախաձեռնության անդամները՝ ազատամարտիկներ Գագիկ Սարուխանյանը, Յուրա Աթոյանը, Գևորգ Սարգսյանը և Ստեփան Ստեփանյանը (Ռեմբո):
Նրանց խոսքով՝ իրենց բնակավայրեր այցելում են մարդիկ, հետաքրքրվում իրենց գործունեությամբ, ապա զգուշացնում, որ այլևս չմասնակցեն ցույցերին: Ազաատմարտիկների պնդմամբ՝ դրանք քաղաքացիական հագուստով ոստիկաններ ու ԱԱԾ աշխատակիցներ են:
Ազատամարտիկներն այս ամենը որակում են որպես խոշտանգում ու քաղաքական հետապնդում:
Գյումրիում բնակող ազատամարտիկ Յուրի Աթոյանը, օրինակ, պատմում է, որ վերջին հանրահավաքից հետո՝ հաջորդ օրը, ինքը տնից դուրս է եկել, երբ իրեն զանգահարել է հարսը և ասել, որ թաղի լիազորն իրենով է հետաքրքվել. «Սա պատահական լինել չի կարող. Եկել, անձնագիրս է ուզել: Ես ո՛չ խուլիգան եմ, ո՛չ գող, ակնհայտ է, թե որտեղից եկավ իր այդ հետաքրքրությունը»:
Մյուս երկու ազատամարտիկներին՝ Գևորգ Սարգսյանին և Ստեփան Սարգսյանին, որոնք բնակվում են Վարդաշեն գյուղում, հանրահավաքներին չմասնակցելու վերաբերյալ զգուշացրել է անձամբ իրենց գյուղապետը:
Գևորգ Սարգսյանն ընդգծեց, որ գալիս են նույնիսկ գիշերը և խորհուրդ տալիս այլևս հանրահավաքներին չմասնակցել: Նա նաև նշեց, որ չնայած այս ամենին՝ շարունակելու են Վոլոդյա Ավետիսյանի ազատության համար պայքարել:
Ստեփան Ստեփանյանը ևս, որը եղել է Վոլոդյա Ավետիսյանի ջոկատից, պատմեց իր հետ տեղի ունեցած միջադեպի մանրամասները. «Երեք օր առաջ տուն եմ վերադառնում, նկատում եմ՝ մեքենա է գնում, գալիս-գնում է: Անցնում եմ, բենզալցակայանի աշատողն ասում է՝ քեզ էին հարցնում, մի հինգ-վեց տղա: Ես էլ ասացի՝ ինձ են հարցնում՝ թող գան տուն: Ինձ համար պարզից էլ պարզ է, թե նրանք ովքեր են»:
Վոլոդյա Ավետիսյանի մարտական ընկերներից Արայիկ Չավիշյանին ևս զգուշացրել են հանրահավաքներին չմասնակցել: Բացի դրանից՝ ջարդել են իրեն պատկանող խանութը: Երբ վերջինս ոստիկանություն հաղորդում է ներկայացրել, Սարուխանյանի խոսքով, եղել է հետևյալ պատասխանը. «Կատարվածի մեջ հանցակազմ գոյություն չունի»:
Հարցուփորձ են անում նաև ազատամարտիկներին հարազատ մարդկանց, ապա ասում՝ կներեք, շփոթել ենք:
Ազատամարտիկներին վրդովեցրել է նաև Սեյրան Օհանյանի՝ Ազգային ժողովում կատարած անդրադարձը Վոլոդյա Ավետիսյանի գործին: Նրանցից Ստեփան Ստեփանյանը նշեց, որ նախկինում շատ է հարգել Օհանյանին, բայց այդ հայտարարությունից հետո կվերանայի իր կարծիքը:
