Իրավապաշտպան Արտակ Զեյնալյանը դրական է գնահատում ՀՀ արդարադատության նախարար Հրայր Թովմասյանի առաջարկն այն մասին, որ Վճռաբեկ դատարանի աշխատանքը պետք է թափանցիկ դառնա իրավաբանների և հասարակության համար: Նա նման տեսակետ հայտնեց «Առաջին լրատվական»-ի հետ զրույցում:
Հիշեցնենք, որ արդարադատության նախարարըՎճռաբեկդատարանիթափանցիկաշխատաոճի մասին մարտի 11-ին հայտարարել էր ԱԺ-ում:
Թովմասյանի խոսքով՝անհրաժեշտ է պարզություն մտցնել չափորոշիչներում, որոնց հիման վրա Վճռաբեկ դատարանը բողոքներ է ընդունում: Բացի այդ, Վճռաբեկ դատարանը պետք է հիմնավորի ընդունած բողոքի առթիվ կայացրած որոշումը:
«Ընդհանրապես դրական է, որ Վճռաբեկ դատարանի որոշումները կանխատեսելի են լինում ինչպես գործը վարույթ ընդունելիս, այնպես էլ մերժելիս: Վճռաբեկ բողոքների քանակը շատ մեծ է, իսկ դրա որոշումները ՝շատ սպասված: Դրանք շատ կարևոր խնդիրներ են լուծում, անկախ նրանից՝ բողոքը բավարարվում է, թե մերժվում: Բոլոր դեպքերում Վճռաբեկ դատարանի որոշումը շատ կարևոր է: Ընդհանրապես, մարդիկ վճռաբեկ բողոք ներկայացնում են, որովհետև վերաքննիչ դատարանի դատական ակտերը համոզիչ չեն, և ակնկալում են, որ Վճռաբեկ դատարանը բացատրություններ տա»,- ասաց Արտակ Զեյնալյանը:
Իրավապաշտպանի խոսքով՝ Վճռաբեկ դատարանը չպետք է լոկ սպառման ատյան լինի: «Մարդիկ հաճախ այստեղ բողոք բերում են միայն այդ ատյանը սպառած լինելու համար: Մինչդեռ Վճռաբեկ դատարանը պետք է դադարի սպառման ենթակա ատյան լինել, քանի որ նրա կայացրած վճիռների որակը շատ բարձր է, և դրանք շատ կարևոր խնդիրներ են լուծում: Եթե համեմատելու լինենք մեր և տարածաշրջանային մյուս երկրների վճռաբեկ դատական ակտերը, ապա ՀՀ Վճռաբեկ դատարանի ակտերն իրնց որակով ու առաջադիմությամբ մեր գործընկերների մոտ ուղղակի նախանձ են առաջացնում: Բայց այստեղ մի «եթե» կա. եթե, իհարկե, վճռաբեկ բողոքը վարույթ է ընդունվում: Իսկ դա շատ քիչ դեպքերում է տեղի ուենում»,- ասաց Արտակ Զեյնալյանը:
«Առաջին լրատվական»-ի հետ զրույցում փաստաբան Հայկ Ալումյանը իր հերթին նշեց. «Այն,որ այս ոլորտը կարիք ունի հստակեցման, և այն, որ Վճռաբեկ դատարանի գործունեությունը կարիք ունի դառնալու թափանցիկ և կանխատեսելի՝ ակնհայտ է: Սրա մասին մենք բազմիցս ենք ասել, այս պատճառով նույնիսկ երկու անգամ գործադուլ ենք արել: Եթե կա մի նախաձեռնություն, որը որոշ չափով կօգնի բարելավել իրավիճակը, ապա ես ողջունում եմ այն»,- ասաց նա:
