Այսօր տեղի ունեցավ Հայաստանի 3-րդ միջազգային բժշկական համագումարը: Համագումարի նախագահ, պրոֆեսոր Դերենիկ Դումանյանը նշեց, որ համագումարին մասնակցելու համար գրանցվել են Հայաստանից, Արցախից, առաջին անգամ Ռուսաստանից և աշխարհի տարբեր երկրներից շուրջ 600 հայ բժիշկներ՝ ավելի քան 250-ը արտասահմանից: Վերջիններս առողջապահության ոլորտի տարբեր փորձագետներ և մասնագետներ են:
Նախկինում համագումարը անց է կացվել արտերկրում 4 տարին մեկ, սակայն այն արդեն անց է կացվում Հայաստանում երկու տարին մեկ անգամ՝ Հայաստանի միջազգային բժշկական համագումարի և սփյուռքում՝ Հայ բժիշկների համաշխարհային կոնգրեսի ձևաչափով:
Ի դեպ, թե՛ Դերենիկ Դումանյանը, թե՛ ելույթով հանդես եկող մյուս մասնակիցները նշեցին, որ համագումարը առանձնահատուկ է նրանով, որ այն տեղի է ունենում Հայաստանի Հանրապետության անկախության հռչակման 20-ամյակի միջոցառումների շրջանակում:
Մասնավորապես հուլիսի 7-9 կքննարկվեն առողջապահական, բժշկական, գործնական բժշկության և բժշկական կրթության մի շարք կարևորգույն հարցեր, կներկայացվեն բժշկագիտության նոր հայտնագրություններ, գործնականում կիրառվող բուժման նորգույն եղանակներ:
Վերջինս կնպաստի Հայաստանում և Լեռնային Ղարաբաղում բժշկական օգնության ոլորտի արդիականացմանն ու որակի բարելավմանը: Իսկ համագումարի խորհրդանշական կարգախոսն է՝ «Միասին՝ հանուն առողջության»:
Համաժողովին իր վեհափառական օրհնությունն էր ուղարկել նաև Գարեգին 2-րդ կաթողիկոսը:
Ներկա էին նաև Առողջապահության նախարար Հարություն Քուշկյանը, Սփյուռքի նախարար Հրանուշ Հակոբյանը և ԿԳ նախարար Արմեն Աշոտյանը:
Ինչպես նաև ՀՀ վարչապետ Տիգրան Սարգսյանը, ով առողջապահության ոլորտում առաջընթաց արձանագրեց՝ մատնանշելով անվճար ծննդօգնությունը,, մինչև 7 տարեկան երեխաների անվճար բուժման ներդրումը, շտապօգնության համակարգի բարելավումը և համավճարի ներդրումը, ինչը կնվազեցնի կոռուպցիոն ռիսկերը առողջապահության համակարգում:
Նա նաև կարևորեց երիտասարդ բժիշկների մասնակցությունը համագումարին:
Սփյուռքի նախարար Հրանուշ Հակոբյանն էլ նշեց, որ համագումարը նպատակ ունի դրսի հայ բժիշկների նորարարությունները ներդնել նաև հայրենիքում և ավելացրեց, որ հայ բժիշկը սփյուռքում իր համար դեսպան է, քանի որ ներկայացնում է հայությանը, Հայաստանը և հայ ժողովրդին:
Իսկ Ռալֆ Յիրիկյանը ներկայացրեց իրենց վերջին նորամուծությունը, որը M-Health տեխնոլոգիան է, ինչը առավել հաճախ կիրառվում է բջջային հաղորդակցման սարքերի, մասնավորապես՝ բջջային հեռախոսների հետ՝ զգալիորեն նպաստելով առողջապահական ծառայությունների ապահովմանը: Այս լուծումը թույլ է տալիս բժշկին հեռավորության վրա հսկողություն սահմանել հիվանդի առոջությանը:
