Հայաստանում Ռուսաստանի Դաշնության դեսպանատունն ուշագրավ հայտարարություն է տարածել այն մասին, որ ՌԴ դեսպան Սերգեյ Կոպիրկինը ՀՀ երկրորդ նախագահ Ռոբերտ Քոչարյանի հետ հանդիպել է հասարակական-քաղաքական և գործարարների հետ իր պարբերական հանդիպումների շրջանակում: Հարց է առաջնում, թե ինչու է դեսպանատունն այսօրինակ պարզաբանման կարիք զգացել:
Հաջորդ հայտարարությունը տարածել է արտաքին գործերի նախարարությունը, որտեղ նշվում է հուլիսի 20-ին Վաշինգթոնում Հայաստանի և Ադրբեջանի արտգործնախարարների պլանավորված հանդիպման մասին՝ միաժամանակ ԱԳՆ հիշատակում է, որ հանդիպմանն ընդառաջ ադրբեջանական կողմը գնացել է սահմանային լարվածության աճի, որը բերել է նաև զոհերի: Այդ համատքեստում ԱԳՆ-ն հայտարարել է, որ ստեղծված իրավիճակը պայմանավորում է վաշինգթոնյան օրակարգի հստակ գերակայությունները:
Այս թեմաների շուրջ «Առաջին լրատվական»-ի հետ քննարկմանը մասնակցեցին վերլուծաբան Հակոբ Բադալյանը, քաղաքագետներ Էդգար Վարդանյանը և Էմիլ Օրդուխանյանը:
Ի՞նչն է ՌԴ դեսպանատանը ստիպել պարզաբանում անել. Հակոբ Բադալյանի դիտարկմամբ՝ այդ քայլին ստիպել է գնալ Հայաստանի հանրային արձագանքը, որ եղավ դեսպանի հետ Քոչարյանի հանդիպումից հետո: «Այդ արձագանքում գերիշխում էր այն, որ ՌԴ-ն բացահայտ կերպով աջակցում է Ռ. Քոչարյանին: Կարծում եմ, որևէ մեկի համար գաղտնիք չէ, որ Քոչարյան քաղաքական գործոնի նկատմամբ հանրության վերաբերմունքը հիմնականում բացասական է: Այս տեսանկյունից Ռուսաստանի դեսպանատան պարզաբանումը փոքր-ինչ նաև արդարացման տողատակ էր պարունակում, և նշվում էր, որ Քոչարյանի հանդեպ առանձնահատուկ վերաբերմունք չկա: Այս դեպքում հարց է առաջանում՝ որպես գործարա՞ր է հանդիպել, թե՞ որպես հասարակական գործիչ, այն պարզ պատճառով, որ Քոչարյանը նաև պաշտոն ունի ՌԴ ընկերություններից մեկում՝ տնօրենների խորհրդի անդամ է»,- նշեց վերլուծաբանը՝ հավելելով, որ այս պարզաբանմամբ՝ փորձեցին պատասխանատվություն չվերցնել Ռ. Քոչարյանի քաղաքական ծրագրերի համար:
Էդգար Առաքելյանի խոսքով՝ Մոսկվան շատ լավ գիտի, թե Հայաստանի հասարակության զգալի մասն ինչպես է վերաբերվում Ռ. Քոչարյանին, և ինչ-որ քայլ անելիս Ռուսաստանը հաշվի է առնում այդ գործոնը, նաև հաշվի է առնում այն հանգամանքը, որ ՀՀ իշխանությունները բազմիցս հայտարարել են, որ իրենք չեն խառնվում դատական պրոցեսին, նաև հստակ մեսիջներ են ուղարկել, որ չեն ենթարկվելու աշխարհաքաղաքական որևէ կենտրոնի ճնշումների: «Բայց նաև ՌԴ իշխանություններն անթաքույց կերպով իրենց դիրքորոշումն են հայտնել Քոչարյանի դատավարության հետ կապված… Այս պարզաբանումը կարող ենք համարել արդարացում, ըստ էության՝ կարող ենք դիտարկել նաև որպես միջամտություն…»:
Էմիլ Օրդուխանյանը դեսպանի պարզաբանումը դիտարկեց երկու՝ քաղաքական և հասարակական հարաբերություններն ուսումնասիրելու հարթությունում:
Մանրամասն՝ տեսանյութում:
