Աբովյանի քաղաքապետի ընտրություններում հաղթեց գործող քաղաքապետը, ՔՊ-ի թեկնածուն պարտություն կրեց: Ի՞նչ քաղաքական հետևանքներ կունենան այս ընտրությունները: Ամիսներ առաջ խորհրդարանական ընտրություններում «Իմ քայլը» դաշինքը ջախջախել էր ԲՀԿ-ին: Ի՞նչ է փոխվել, որ քաղաքապետի ընտրություններում այսպիսի արդյունքներ գրանցվեցին: Թեմայի շուրջ «Առաջին լրատվական»-ի հետ զրույցում անդրադառնալով այս հարցերին՝ բանաստեղծուհի Մարինե Պետրոսյանը նշեց. «Իմ տպավորությամբ՝ վատ բան է կատարվել, չնայած ոմանք ասում են, որ դեմոկրատիայի հաղթանակն է, բայց եթե անգամ դեմոկրատական ընտրություններ են եղել, և իսկապես ժողովուրդն է ընտրել հին քաղաքապետին, որի մրցակիցը ՔՊ-ի թեկնածուն էր, դա վատ նշան է: Աբովյանը հենց այնպես քաղաք չէ, կապվում է Գագիկ Ծառուկյանի անվան հետ, և նա էլ աջակցում էր գործող քաղաքապետին այս ընտրություններում. ժողովուրդը ինքնակամ հնին է ընտրել, դա վատ է: Համաձայն եմ Կոտայքի մարզպետի հետ, որ դա պարտություն էր: Այս պարտությունը վկայում է այն մասին, որ նորը չի կարողանում իրեն լավ հաստատել»:
«Հեղափոխությունը մերժումի վրա էր հիմնված, բայց անընդհատ մերժումի վրա հիմնվելը լավ չի լինի, դա նշանակում է, որ քաղաքական օրակարգում անընդհատ հինն է, և դա շատ վատ է»,- նշեց Մ. Պետրոսյանը:
Բանաստեղծուհու կարծիքով՝ հեղափոխության շարունակությունը կարող է երեք տարբերակով լինել. «Առաջինը՝ բավական ուժեղ հիասթափություն կարող է լինել, և դա օգտագործելով՝ նախկին ուժերը կվերադառնան. սա վատագույն տարբերակն է, և ռեալ չէ, որ այդպես կլինի: Երկրորդ՝ հիասթափությունը կտրուկ չի լինի, այլ դանդաղ, և դանդաղ էլ ոգևորությունը կմարի, ու փոփոխությունները կմարեն, կունենանք դեմոկրատական որոշ փոփոխություններ, գուցե տնտեսական աճ, բայց Հայաստանը «կլռվի»: Ցավոք, սա հնարավոր տարբերակ է: Երրորդը ցանկալի տարբերակ է՝ Հայաստանում արմատական փոփոխություններ կկատարվեն, այդ թվում նաև կարգավիճակի հարցում, և աղքատ, ոչինչ չորոշող պետությունից Հայաստանը կվերածվի առաջատար պետության: Սա, կարծում եմ, բոլոր հայերի երազանքն է: Այսօր մենք ունենք ռեալ շանսեր, պետք է գիտակցված ջանքեր գործադրել»:
Մանրամասն՝ տեսանյութում: