Disney ընկերությունը Ռեյ Բրեդբերիի «Աղետ է մոտենում» (Something Wicked This Way Comes) վեպի նոր էկրանավորում կթողարկի: Այս մասին հայտնում է Deadline պորտալը:
Ֆիլմի սցենարի նախնական տարբերակը գրելը հանձնարարվել է Սեթ Գրեմ-Սմիթին, ով «Հպարտություն և նախապաշարմունք և զոմբի» և «Աբրահամ Լինքոլն. վամպիրների որսորդ» գրքերի հեղինակն է: Գրողի խոսքով՝ «Աղետ է մոտենում» վեպը եղել է իր մանկության ամենասիրած գիրքը:
Վեպն առաջին անգամ հրատարակվել է 1962 թվականին: Բրեդբերին դրա մասին մտածել էր դեռևս 1950-ականների կեսերին: Նա ծրագրել էր գրել ֆիլմի սցենար, որի ռեժիսուրայով կզբաղվեր Ջին Քելին: Սակայն նախագիծը չի ֆինանսավորվել, և արդյունքում Բրեդբերին իր գաղափարը կյանքի է կոչել գրքի տեսքով:
Վեպը պատմում է երկու 14-ամյա դեռահասների մասին, ովքեր կառնավալի ժամանակ նկատում են, որ միջոցառման ղեկավար պարոն Դարկը ցանկություններ է կատարում՝ մարդկային հոգիների դիմաց:
1983-ին Disney-ն արդեն էկրանավորել է գիրքը: Այդ ֆիլմի սցենարի վրա Բրեդբերին անձամբ է աշխատել: 19 մլն դոլար բյուջեով ֆիլմը վարձույթում ձախողվել է՝ ԱՄՆ-ում հավաքելով 8.4 մլն դոլար:
