Թուրքիայի կառավարությունը պետք է ընտրություն կատարի Ռուսաստանից S-400 ԶՀՀ-ներ ձեռք բերելու և ԱՄՆ-ից F-35 կործանիչներ ստանալու միջև։ Այս մասին հայտարարել է ՆԱՏՕ-ում ԱՄՆ-ի մշտական ներկայացուցիչ Քեյ Բեյլի Հաթչինսոնը CNBC հեռուստաալիքի եթերում։
Հաթչինսոնի խոսքով՝ Թուրքիան կարող է ստանալ «կա՛մ մեկ, կա՛մ մյուսը, ոչ թե երկուսը» և եթե ամեն դեպքում որոշի ձեռք բերել S-400-ները, ապա չի ստանա արդեն պատվիրած F-35-երը։
Նրա կարծիքով՝ Թուրքիայի՝ ռուսական հրթիռային համալիրի ձեռք բերումը Կրեմլին կօգնի «թուլացնել դաշինքը»։
Հաթչինսոնը հավելել է, որ ՆԱՏՕ-ն ուշադրությամբ հետևում է իրադարձությունների զարգացմանը և «դաշինքի համար ոչ մի սպառնալիք տեսնել չի ցանկանում»։ Ընդգծվում է, որ չպետք է լինի մրցակցություն, որը «կխլի դոլարներ», որոնք անհրաժեշտ են դաշինքի ուժերի ամրապնդման և հնարավոր սպառնալիքները հետ մղելու համար։