ՀՀ Մաքսային ծառայության գնդապետ Բաբկեն Ղազարյանը դիմել է դատարան՝ «Իրազեկ քաղաքացիների միավորում» ՀԿ-ի նախագահ Դանիել Իոաննիսյանից պահանջելով զրպարտություն համարվող տեղեկությունները հերքել։
Ավելի վաղ Դանիել Իոաննիսյանը քննարկման ժամանակ խոսել էր ԱԱԾ պետի և քրեական հեղինակությունների սերտ կապերի մասին․ «Վստրեչի Ապեր, Վովայի Արշակ, Թոխմախի Բաբո. այդ մարդիկ հիմա իրենց ավելի ազատ են զգում, քան նախկինում։ Այդ մարդիկ Երևանի Էրեբունի վարչական շրջանից են: Ուզում եմ հիշեցնել, որ Արթուր Վանեցյանն էլ նախկինում ԱԱԾ Էրեբունու բաժնում է աշխատել և դեռ այն ժամանակներից, ըստ շրջանառվող լուրերի, բավականին մտերիմ հարաբերություններ ունի նրանց հետ։ Կրկնում եմ՝ երբեք ինձ մոտ չի եղել այնպիսի տպավորություն, որ ԱԱԾ տնօրենը համագործակցի քրեական հեղինակությունների հետ»,-հայտարարել էր Դանիել Իոաննիսյանը։
Իր հայտարարության մեջ Բաբկեն Ղազարյանը նշել է, որ չփաստարկված տեղեկությունների, պարզապես հերյուրանքների տարածումը ԶԼՄ-ներով և դրանք անարձագանք թողնելը կարող են հանիրավի ստվեր նետել իր պատվի և արժանապատվության վրա․«Հարկ եմ համարում հիշեցնել հասարակության լայն զանգվածներին, որ Իոաննիսյանը հստակ նպատակադրումով պախարակելու գործընթաց է սկսել՝ ինչպես իմ, այնպես էլ ԱԱԾ տնօրենի անձի և գործունեության նկատմամբ: Այսինքն՝ փորձ է արվում՝ անտեսելով պետական կառավարման համակարգում իմ աշխատանքային երկարամյա գործունեությունը, ստվեր նետել իմ անձի վրա»:
Ինքը՝ Դանիել Իոաննիսյանը, Բաբկեն Ղազարյանի տարածած հայտարարությունից անակնկալի է եկել, անգամ անուն ազգանունը նախկինում իր համար հայտնի չէ․«Ես տարբեր աղբյուրներից տեղեկացել էի, որ Արթուր Վանեցյանը որոշակի հարցերում համագործակցել է Թոխմախի Բաբկեն մականունով ինչ-որ մեկին և նաև տեղեկացրել էի իրենց համատեղ որակի գործողությունների մասին, որոնցով հետաքննություն է ընթանում և ըստ էության որևէ մասով ինձ չէր հետաքրքրում, թե ով է Թոխմախի Բաբկենն ընդհանրապես, որովհետև իմ հետաքրքրություններն ավելի շատ հենց ԱԱԾ տնօրենի արարքներն էին։ Եվ մի քիչ սյուռ է, որ ինքը դատի է տալիս, պնդում է, որ մականունավոր Թոխմախի Բաբկենն ինքն է»,-«Առաջին լրատվական»-ի հետ զրույցում ասաց Իոաննիսյանը։
Իրեն դատի տալու հետ կապված Դանիել Իոաննիսյանը խնդիր չի տեսնում, նշեց, որ եթե վստահ է, որ ինքն իրավական առումով ամուր հիմքերի վրա է, ապա ինքը խնդիր չի տեսնում։
Այսօր արդեն իրենց հետաքննական լրագրությամբ զբաղվող թիմին պարզել՝ ով է Բաբկեն Ղազարյանը․ «Կայցելեն նրա տուն, նկարահանումներ կանեն տան շրջակայքում, այսինքն՝ հասկանանք՝ ով է այս մարդը։ Ազնվորեն ես երեկ առաջին անգամ եմ նրա ազգանունը լսել։ Նրա կենսագրական տվյալները երեկ առաջին անգամ եմ կարդացել»։
Դպրոցի տնօրենները, որոնք նախորդ իշխանության ժամանակ դատի էին տվել Դանիել Իոաննիսյանին, հետ վերցրին իրենց հայցերը։ Դպրոցի տնօրենների խելքը, նրա խոսքով, հերիքեց, որ հայցերը հետ վերցնեն, քանի որ հասկացան՝ իրենք շատ լուրջ խնդրի առաջ են կանգնում․ «Հիմա չգիտեմ՝ Բաբկեն Ղազարյանը երբ կհասկանան, կհասկանան, կամ չեն հասկանա, որ դա վատ միտք է, բայց ամեն դեպքում դատարն դիմելը իր սահմանադրական իրավունքն է, և ես որևէ խնդիր չունեմ։ Ես չեմ համարում, որ որևէ մեկին զրպարտել եմ։ Թող գնա դատարան, դատարանում նախ սկսի ապացուցել, որ Թոխմախի Բաբոն ինքն է, հետո մանրամասն պատմի տարբեր գողականների հետ իր ունեցած հարաբերությունների մասին, հետո նոր դատարանը կգնահատի»։
Արթուր Վանեցյանի պատասխանն էլ իր՝ քրեական հեղինակությունների կապի վերաբերյալ Իոաննիսյանին չեն գոհացրել, ավելին՝ այդ պարզաբանումները, ըստ նրա, լիովին սուտ են և իրականում կան այդ հարաբերությունները սերտ լինելու հետ կապված ապացույցներ․ «Իրենք իրար շատ հարցերում սատարում են, աջակցում են, օգնում և միմյանց առջև ծառացած խնդիրները լուծում են Արթուր Վանեցյանն ու Վստրեչի ապերը և կան ապացույցներ»,-հավելեց Իոաննիսյանը։
