«Պնդում են, թե այս որոշումն ընդունվել է Կաթողիկոսի այցի ընթացքում, որի ժամանակ եկավ նաև Հայաստանի արտգործնախարարը և լուծեց այս հարցը: Իհարկե ոչ, նման բան չի եղել, քաղաքացիական օրենսգրքում այդ փոփոխությունը պլանավորված էր դեռևս տարեսկզբին»,- «Առաջին լրատվականի» հետ զրույցում, խոսելով Վրաստանի խորհրդարանի ընդունած օրենսդրական փոփոխությունների դրդապատճառների մասին, կարծիք հայտնեց Վրաստանի նախագահի՝ ազգային փոքրամասնությունների հարցերով խորհրդական Վան Բայբուրդը:
Հիշեցնենք, որ երեկ Վրաստանի խորհրդարանը ընդունել է քաղաքացիական օրենսգրքում նախատեսվող փոփոխությունները, որոնց համաձայն իրավաբանական անձի կարգավիճակ է շնորհվում երկրում գործող կրոնական միություններին, այդ թվում` Հայ Առաքելական եկեղեցուն:
Բայբուրդը նկատեց, որ Ամենայն Հայոց Կաթողիկոսի այցի ընթացքում կոմյունիկեների հարցը չի քննարկվել, և այս հանդիպումն այնքանով էր աննախադեպ, որ շուրջ 8 տարի Հայաստանի և Վրաստանի հոգևոր հայրերը չէին հանդիպել, և վստահեցրին, որ նման հանդիպումները կլինեն ամեն տարի:
Կրոնական կազմակերպություններին իրավաբանական կարգավիճակ տալու մասին որոշմանը դեմ են արտահայտվել Վրաստանի ընդդիմադիրները: Բայբուրդի գնահատմամբ` ընդդիմադիրների առաջ քաշած փաստարկները անհիմն են. «Նրանք նշում են, թե այս որոշումից հետո Վրաստանում գործող կրոնական կազմակերպությունների եկեղեցիները հողեր կստանան, հարկեր չեն վճարի, բայց դա այդպես չէ, նման առավելություն ունի միայն Վրաստանի ուղղափառ եկեղեցին»:
Վան Բայբուրդը նկատեց, որ ընդդիմության մեկ այլ առարկությունն էլ այն է, որ նրանք պնդում են, թե Վրաստանը կլցվի այլ դավանանքի կառույցներով. «Ոչ, նման բան չի լինի, պարզապես ընդդիմությունը հիմա առիթը ձեռքից բաց չի թողնում, որպեսզի ամեն ինչում քննադատեն նախագահ Սաակաշվիլիին: Բայց սա քաղաքակիրթ պետության քայլ էր, և մտավորականների ու փորձագետների մեծ մասը ողջունում են վրացական խորհրդարանի այս որոշումը»,- մանրամասնեց Վան Բայբուրդը: Նա նաև ընդգծեց, որ վրաց ժողովրդի հինգ տոկոսն էլ չի անցնում, ովքեր նման դժգոհություն են արտահայտում Վրաստանի խորհրդարանի որոշման նկատմամբ:
Հարցին, թե հնարավո՞ր է այս որոշումից հետո վրացական կողմը Հայաստանից ևս պահանջի նման կարգավիճակ տալ Հայաստանում գործող եկեղեցիներին, Բայբուրդը պատասխանեց, որ Հայաստանի օրենքը կրոնական կազմակերպությունների մասին որևէ խնդիր չի առաջացնում այլ դավանանքի ներկայացուցիչների և կառույցների համար, և բոլորը կարող են շատ հեշտությամբ գրանցվել և գործունեություն ծավալել Հայաստանում:
Բայբուրդը նաև նկատեց, որ առանց կարգավիճակի տրամադրման էլ, վերջին տարիներին հայկական եկեղեցիները վերանորոգվում էին: Բայբուրդը պարզաբանեց, որ այս որոշումից հետո, Վրաստանում գործող հայկական և մյուս եկեղեցիները կունենան քաղաքական, լուսավորչական, սոցիալական գործունեություն իրականացնելու իրավունք, ինչպես դա անում են Վրաստանում իրավաբանական կարգավիճակ ունեցող կրթական հաստատությունները:
