Lenta.ru-ի փոխանցմամբ՝ վրացական ընդդիմության ներկայացուցիչները դիմել են նախագահ Միխեիլ Սաակաշվիլիին՝ կոչ անելով հրաժարվել հուլիսի 5-ին խորհրդարանում ընդունված կրոնական միություններին կարգավիճակ շնորհող օրենքից։ Այդպիսի կոչով մասնավորապես հանդես են եկել «Մեր Վրաստան – Ազատ դեմոկրատներ» կուսակցության առաջնորդ Իրակլի Ալասանիան և «Ապօրինի դատապարտվածներին համերաշխություն» շարժման առաջնորդ Էկա Բեսելիան։
Ընդդիմադիրների կարծիքով՝ պատրիարքարանի կողմից քննադատության արժանացած այդ փաստաթղթի վրա պետք է վետո դրվի, իսկ կրոնական միություններին կարգավիճակ շնորհելու կապակցությամբ պետք է անցկացվեն հասարակական քննարկումներ։ Այսպիսի կոչով հանդես է եկել մեկ այլ ընդդիմադիր ուժ՝ «Նոր աջեր» կուսակցությունը։
Հիշեցնենք, որ Վրաստանում իրավաբանական անձի կարգավիճակ են ստանալու Հայ առաքելական եկեղեցին, Հռոմի կաթոլիկ եկեղեցին, մուսուլմանական համայնքը, հուդայական համայնքը և բապտիստական եկեղեցին։
