Թուրքական Zaman թերթի փոխանցմամբ՝ թուրք նորընտիր պատգամավորների երդման արարողության վերջնաժամկետը սպառվում է հուլիսի 15-ին։
Սահմանադրության 84-րդ հոդվածի և Թուրքիայի Ազգային մեծ ժողովի (ԹԱՄԺ) ներքին կանոնակարգի 138-րդ հոդվածի համաձայն՝ մեկ ամսվա ընթացքում առանց հարգելի պատճառի 5 նստաշրջանից բացակայած պատգամավորները զրկվում են իրենց պատգամավորական լիազորություններից։
Երդման արարողությունը և ԹԱՄԺ-ի առաջին երկու նիստերը բոյկոտած գլխավոր ընդդիմադիր ուժ Ժողովրդա-հանրապետական կուսակցության (ԺՀԿ) և քրդական «Խաղաղություն ու ժողովրդավարություն» կուսակցության (ԽԺԿ) նորընտիր պատգամավորները պետք է կողմնորոշվեն մինչև հուլիսի 15-ը, քանի որ մինչ այդ տեղի են ունենալու ԹԱՄԺ-ի հաջորդ երեք նիստերը։
Եթե պատգամավորական լիազորություններից զրկվածների թիվը գերազանցում է ԹԱՄԺ-ի ողջ կազմի (550 մանդատ) 5 տոկոսը (28 մանդատ), ապա երեք ամսվա ընթացքում անցկացվում են միջանկյալ ընտրություններ։ Նշվում է, որ այդ դեպքում իշխող «Արդարություն և զարգացում» կուսակցությանը (ԱԶԿ) կհաջողվի ստանալ խորհրդարանական մեծամասնություն՝ 367 քվե (2/3-ը)։
Հիշեցնենք, որ ԺՀԿ-ն ԹԱՄԺ-ում ունի 135 ներկայացուցիչ, իսկ ԽԺԿ-ն՝ 35։