Թաիլանդի ժամանակավոր կառավարությունը համաշխարհային շուկայում պատրաստվում է բրնձի զանգվածային վաճառքի: Բրինձը կուտակվել է «բրնձային գրավ» պետական ծրագրի տեղապտույտի արդյունքում: Այս մասին հայտնում է RIA Novosti-ն՝ հղում անելով տեղի ԶԼՄ-ներին:
Չորեքշաբթի Թաիլանդը և Չինաստաը կնքել են պայմանագիր տարվա ընթացքում 1 մլն տոննա բրնձի մատակարարման մասին: Գործարքը ծրագրվել էր ավելի բարձր գնով դեռևս 2013-ի աշնանը, սակայն խափանվելէր ծրագիրն իրականացնող պաշտոնյաների գործունեության նկատմամբ հակակոռուպցիոն հանձնաժողովի հետաքննության պատճառով: Անցած շաբաթ բանակցությունները վերսկսվել էին նոր պայմաններով:
Ներկայում կառավարությունը համաձայնագրեր է պատրաստում ևս մի շարք երկրների հետ, իսկ բրնձի համաշխարհային շուկայում մեծածախ գործարքները կանգնեցվել են ցածր գներով թաիլանդական որակյալ բրնձի սպասման պատճառով:
Կառավարությունը ստիպված է վաճառել կուտակված բրինձը համաշխարհային գներից ցածր գներով՝ վճարելու միլիոնավոր ֆերմերային տնտեսությունների պարտքերը, որոնք մասնակցում են ծրագրին: Ներկայում պարտքը կազմում է մոտ 4 միլիարդ դոլար: Այն հունվար-փետրվար ամիսներին դարձել էր գյուղացիների զանգվածային ցույցերի պատճառ, հանգեցրել կառավարության դեմ մի շարք դատական հայցերի ներկայացման:
Նշենք, որ ծրագրի շրջանակում կառավարությունը գյուղացիներից բրինձ է ընդունել ուռճացված գներով՝ միջկառավարական պայմանագրերով արտերկրում վաճառելու համար: Ծրագիրը մտածվել էր որպես գյուղատնտեսական ոլորտի անուղղակի սուբսիդավորում:
