Առողջապահության նախարար Դերենիկ Դումանյանը մարտի 6-ին կառավարության նիստից հետո լրագրողների հետ ճեպազրույցում անդրադարձավ հղիության ախտաբանության համավճարի կիրառման հետաձգմանը: Նախարարի խոսքով` այդ որոշումը պայմանավորված էր նրանով, որ նաև ուսումնասիրեցին, տեսան, որ հասարակության կարծիքն այդ հարցի կապակցությամբ միանշանակ չէ, և հաշվի նստեցին այդ կարծիքի հետ, նաև տեսան, որ խնդիրը լավ նախապատրաստված չէր:
«Նախ ասեմ` ինչն էր պատճառը, որ այն որոշեցինք կիրառել: Փաստը ցույց է տալիս, որ գումարային տարբերություններ կային` նորմալ ֆիզիոլոգիական ծնունդի և հղիության պաթոլոգիայի դեպքում, պաթոլոգիաների թիվն ավելացել էր, փորձում էինք ճշտել` ո՞րն էր խնդիրը: Ուսումնասիրությունները ցույց տվեցին, որ շատ դեպքերում որոշակի հավելագրումներ են տեղի ունենում, դա կանխարգելելու առաջարկներից մեկն այն էր, որ որոշակի (ունևոր խավերի համար, խոսքը սոցիալապես անապահով, տարբեր խնդիրներ ունեցողներին չէր վերաբերում) խավերի համար դնել համավճար»,- ասաց նա` հավելելով, որ պետությունն էլի իր միջոցներից տրամադրում էր այն չափով, որքան նախատեսված էր: Այդ միջոցառումը միայն Երևանում պիտի իրականացվեր:
Նախարարի խոսքով` ոչ մեկը չի ժխտում` դեռևս ստվեր գոյություն ունի առողջապահության համակարգում, և եթե հաջողվի այդ ստվերը բերել իրավական դաշտ, շատ ուրախալի կլինի: Նա նշեց, որ վերջին երեք տարվա ընթացքում ստվերը երեք անգամ պակասեցրել են, այդ մասին հայտարարելու առիթ ունեցել է, սակայն դեռևս կան ստվերային երևույթներ: Ստվերի նվազեցմանը նպաստող հանգամանք կլինի նաև բուժաշխատողների աշխատավարձի բարձրացումը հուլիսի 1-ից. այդ նպատակով բավական միջոցներ են տրամադրվելու:
