ԱՄՆ նախագահ Դոնալդ Թրամփը Իրանի ղեկավարությանը կոչ է արել նստել բանակցությունների սեղանի շուրջ և իր հետ քննարկել Թեհրանի միջուկային ծրագրից հրաժարվելու հարցը։ Ընդ որում, նա չի բացառել ռազմական հակամարտությունը՝ հաշվի առնելով երկու երկրների միջև լարվածության սրումը, հայտնում է Reuters-ը։
Թրամփը հրաժարվել է բացահայտել «Աբրահամ Լինքոլն» ավիակիրների խումբը Մերձավոր Արևելք ուղարկելու պատճառը։ «Նրանք մեծ սպառնալիք են ներկայացնում, և մենք պետք է ապահովենք անվտանգությունը»,- ասել է նա։
Այն հարցին, թե կա արդյոք ռազմական հակամարտության վտանգ այդ տարածաշրջանում, Թրամփը պատասխանել է․ «Ես չեմ ուզում ասել ոչ, սակայն, հուսով եմ, դա տեղի չի ունենա։ Մենք ունենք աշխարհում ամենահզոր նավերից մեկը, և մենք չենք ուզում որևէ բան ձեռնարկել»։
Թրամփը կրկին Իրանի առաջնորդների հետ հանդիպելու պատրաստակամություն է հայտնել։ «Այն, ինչ պետք է նրանք անեն՝ զանգել ինձ և նստել բանակցությունների սեղանի շուրջ։ Մենք կարող ենք գործարք կնքել, արդար գործարք։ Մենք ուղղակի չենք ուզում, որ նրանք միջուկային զենք ունենան։
Նրանք պետք է զանգեն։ Եթե նրանք դա անեն, մենք բաց ենք զրույցի համար»,- ասել է ԱՄՆ նախագահը։