«Առաջին լրատվական»-ի զրուցակիցն է «Ազատամարտիկների դաշինքի» խորհրդի անդամ Ռազմիկ Պետրոսյանը։
– Պարոն Պետրոսյան, դուք հայտարարել էիք Արցախի նախագահական ընտրություններում ՊԲ նախկին հրամանատար Սամվել Բաբայանին սատարելու մասին։ Առաջիկա ձեր գործողությունները որո՞նք են լինելու։
– Սամվել Բաբայանն իր հանդիպումներն է կազմակերպում, ընթացքում, երբ արդեն պարզ կլինի, որ ստորագրահավաք է անցկացնելու, մեր այնտեղի մարտական ընկերների հետ կաջակցենք, եթե այդպիսի կարիք լինի։ Կարծես թե հանդիպումները նորմալ են ընթանում, բնակչության հետ հանդիպում ու իր ծրագրերն է ներկայացնում։ Ինձ թվում է՝ այս փուլում աջակցության կարիք չկա, եթե առաջիկայում լինի, անպայման մեր հնարավորության սահմաններում օգտակար կլինենք։
– Այսինքն՝ մնում եք այն տեսակետին, որ Արցախի հաջորդ նախագահը պետք է Սամվել Բաբայա՞նը լինի։
– Այո՛, մենք նախընտրում ենք, որ Սամվել Բաբայանը լինի, մենք նրան վստահում ենք։ Արցախում հզոր ձեռքի անհրաժեշտություն կա, իսկ Բաբայանը հենց այդպիսին է։
– Իր մի քանի հայտարարություններ լայն քննարկման արժանացան և ինչ-որ տեղ հակասում են նաև ձեր մոտեցումներին։ Նա նշել է, որ Մարտի 1-ին կրակելու հրաման Ռոբերտ Քոչարյանը չի տվել. ինչպե՞ս եք վերաբերվում իր այս մոտեցմանը։
– Իհարկե, տարակուսելու խնդիր կա այստեղ։ Այդ հարցը մենք իրեն տվել ենք։ Տպավորություն է, որ նա պաշտպանում է երկրորդ նախագահին Մարտի 1-ի հետ կապված, բայց երբ ուշադիր լսում ենք, նա մեջբերում է քննչական մարմնի ներկայացրածը, որ իրեն մեղադրանք է առաջադրված ոչ թե զոհերի հետ կապված, այլ սահմանադրական կարգի տապալման։
Մարտի 1-ի բոլոր պատասխանատուները անկասկած պատժվելու են։ Ես չեմ հավատում, բայց եթե պարզվի, որ Սամվել Բաբայանը պաշտպանում է Քոչարյանին, մենք տարբեր ճամբարներում կհայտնվենք։ Ես չեմ հավատում, որ կարող է մի հայ լինել, որ Մարտի 1-ի մեղավորներին աջակցության խնդիր դնի։ Հիմա ուղղակի նա պահում է անմեղության կանխավարկածի խնդիրը ու մեջբերում քննչական կոմիտեի վարկածը, որ Քոչարյանը Մարտի մեկի զոհերի համար չի մեղադրվում, այլ սահմանադրական կարգի տապալման։ Բայց ես հստակ ուզում եմ հայտարարել, որ եթե որևէ մեկը փորձի պաշտպանել Մարտի 1-ի մեղավորներին, ես կլինեմ հակառակ կողմում։
– Այսինքն՝ ֆիքսենք, որ եթե նա հետագայում փորձի պաշտպանել Քոչարյանին, դուք այլևս չեք համագործակցի։
– Ընդհանրապես Մարտի 1-ի և Հոկտեմբերի 27-ի պաշտպանողների կողքին լինել չենք կարող։
– Քաղաքական դաշտում ձեզ համար ջրբաժա՞ն են այդ երկու հանցագործությունները։
– Միանշանակ, Հոկտեմբերի 27-ի ու Մարտի 1-ի մեղավորներին պաշտպանողները մեր շրջապատում չեն կարող լինել, մենք իրենց կողքին չենք հայտնվի։