ԱՄՆ նախագահ Դոնալդ Թրամփը ապրիլի 27-ին չի գնացել Սպիտակ տան թղթակիցների ասոցիացիայի (WHCA) ավանդական ամենամյա ընթրիքին: Այս մասին հաղորդում է AFP գործակալությունը:
Թրամփը բոյկոտում է այս միջոցառումը արդեն երրորդ անգամ: Ընդունելությանը ներկա գտնվելուց հրաժարվել են նաև նրա վարչակազմի մի ամբողջ շարք ներկայացուցիչներ:
Պետության ղեկավարը լրագրողների հետ շփումից ավելի գերադասել է մասնակցությունը քաղաքական ցույցին Գրին Բեյում (Վիսկոնսին նահանգ): Ելույթ ունենալով իր կողմնակիցների առաջ՝ նա հերթական անգամ ԶԼՄ-ներին անվանել է «ժողովրդի թշնամիներ»:
«Նրանք խաբեբաներ են: Իսկ գիտե՞ք ինչն է ամենից վատ. նրանց կազմած վարկանիշները, որովհետև մարդիկ չեն հավատում դրանց»,- հայտարարել է նա:
Սպիտակ տան թղթակիցների ասոցիացիայի ընթրիքին ներկայությունը պարտադիր չէ ԱՄՆ նախագահների համար, սակայն այդ ավանդույթը ընդհանուր առմամբ և ամբողջովին պահպանվում է 1921 թվականից: Մինչ Թրամփը՝ վերջինը, որ հրաժարվել է այցելել միջոցառմանը, եղել է 1981թ. ԱՄՆ 40-րդ նախագահ Ռոնալդ Ռեյգանը, սակայն նա ուներ համոզիչ պատճառ. մինչ ընդունելությունը Ռեյգանը ենթարկվել էր մահափորձի և վերականգնվում էր հրաձգային վիրավորումից: