Ռուսական «Россия-1»-ը պրոպագանդիստական հեռուստաալիք է, որը ամբողջությամբ սպասարկում է «Պուտինյան» ռեժիմի շահերն ու հետաքրքրությունները: Դրա աշխատանքները ուղղակիորեն համակարգվում են նախագահի աշխատակազմի և մամուլի քարտուղար Դ. Պեսկովի կողմից: Նույն տրամաբանությունը գործում է նաև մյուս հեռուստաալիքների պարագայում, բայց «Россия-1»-ը, մյուսների հետ համեմատած, աչքի է ընկնում առանձնակի մոլեռանդությամբ ու ցինիզմով:
Հեռուստաալիքի առաջնային քարոզչական գործիքներից մեկը «60минут по горячим следам» հաղորդումն է, որի նպատակն է լվանալ ՌԴ քաղաքացիների գլուխներն ու ապացուցել ռեժիմի գոյության ճշմարտացիությունը: Ասվածի վառ վկայությունն այն է, որ հեռուստաալիքի գրեթե բոլոր հաղորդումների և առավել ևս «60минут»-ի ընթացքում ավելի շատ խոսում են Ուկրաինայի, այլ ոչ թե Ռուսաստանի մասին: Կարծես թե, Ռուսաստանում ոչ մի ուրիշ խնդիր չկա և ռուս ժողովրդի առջև ծառացած միակ սպառնալիքը Ուկրաինան է: Բայց սա դեռ ամենը չէ. «60минут»-ի տխրահռչակ հաղորդավարները գրեթե բոլոր թողարկումների ժամանակ ատելություն են տարածում Ուկրաինայի նկատմամբ, ինչպես նաև՝ փառաբանում և գովերգում Վ. Պուտինին և ՌԴ իշխանություններին:
Կարծում եմ մեր ընթերցողները արդեն իսկ պատկերացում կազմեցին, թե ինչպիսի արժեքային միջավայրում է գործում այդ հեռուստաալիքը և այդ իսկ պատճառով առաջարկում եմ այլևս չխորանալ մանրամասների մեջ ու անցնել բուն թեմայի քննարկմանը:
Օրեր առաջ «60минут»-ի հերթական ուղիղ եթերին միացել էր նաև ՀՀ վարչապետ Նիկոլ Փաշինյանը: Ինչպես միշտ հաղորդման քննարկման առարկան Ուկրաինան էր, և Հայաստանի վարչապետը հաղորդավարների առաջարկով պետք է խորհուրդներ տար Ուկրաինայի նորընտիր նախագահ Վ. Զելինսկուն, թե ինչպես հանդիպումների ժամանակ շփվել ՌԴ նախագահ Պուտինի հետ:
Իհարկե ՀՀ վարչապետը կուլ չտվեց պրոպագանդիստների խայծն ու հանդես եկավ հավասարակշռված պատասխանով, բայց այս պարագայում էականը ոչ թե Փաշինյանի խոսքն է, այլ հաղորդավարների ոչ կոռեկտ ու ցինիկ վարքագիծը: Տպավորությունն այնպիսին է, որ նրանք փորձում էին Պուտինին պատկերել զորեղ ու անհաղթահարելի տիրակալի կերպարով, որի հետ նույնիսկ փոքրիկ շփումը չափազանց մեծ պատասխանատվություն է: Ինչ-որ իմաստով սա էլ զարմանալի չէ, քանի որ հեռուսաալիքը Պուտինին գերբնական տիտանի կարգավիճակ շնորհում է գրեթե ամեն օր: Զարմանալին այն է, որ հենց ՀՀ վարչապետն էր դարձել ցինիզմով ողողված քարոզչության գործիքն ու փաստորեն իր ներկայությամբ հաստատում ու լեգիտիմացնում էր այդ ամենը: Ինչպես նշեցինք արդեն կարևոր էլ չէ, թե ինչ է պատասխանել Փաշինյանը, էականը նրա մասնակցությունն էր այդ կրկեսին, որը սկզբունքորեն անընդունելի էր:
Փաստորեն ռուսական հեռուստաալիքի պրոպագանդիստները այնպիսի տպավորություն էին փորձում ստեղծել, իբրև թե Պուտինը միջնադարյան տիրակալ է, իսկ Հայաստանի վարչապետը՝ վասալը նրա: Եվ արդեն իսկ դասեր քաղած վասալը պետք է խորհուրդ տա ուկրաինական ապստամբած վասալին, թե ինչպես շփվել «Ռուսական սրբազան կայսրության» կայսեր հետ:
Սա իհարկե նվաստացուցիչ վերաբերմունք է, և ՀՀ վարչապետը՝ որպես ինքնիշխան պետության առաջնորդ, լավ կանի այլևս չմասնակցի համանման քարոզչական կրկեսների: Դա պատիվ չի բերում ո՛չ Հայաստանին և ո՛չ էլ հայ ազգին:
