Ապրիլի 4-ին «Ժամանակ» օրաթերթը «Մրից՝ մրջուր․ Թարգմանիչը՝ Ջրտնտպետկոմի նախագահ» վերնագրով լուր էինք հրապարակել, որտեղ գրել էինք, որ մարտի 29-ին վարչապետ Նիկոլ Փաշինյանը ջրային տնտեսության պետական կոմիտեի նախագահ նշանակեց Վարդան Մելքոնյանին, ով այդ պաշտոնում փոխարինեց Ինեսա Գաբայանին: Այս նշանակումը համակարգում ընդունվել է հետևյալ ձևակերպմամբ՝ մրից ելանք, ընկանք մրջուրը: «Խնդիրն այն է, որ Մելքոնյանը ոլորտի մասնագետ չէ, նա այնքան հեռու է այս համակարգից, որ նրա կենսագրությունը որևէ տեղ չհրապարակվեց: Ըստ համակարգին ծանոթ մասնագետների՝ նա մասնագիտությամբ թարգմանիչ է և որպես թարգմանիչ է առնչվել համակարգի հետ: Վարչապետ Փաշինյանին մի քանի փորձառու թեկնածու է առաջարկվել, որոնք կարող էին ղեկավարել համակարգը, բայց բոլորի համար անհասկանալի նրա ընտրությունը կանգ է առել Մելքոնյանի վրա»,-գրել էինք հրապարակման մեջ:
Լուրի հրապարակումից հետո Վարդան Մելքոնյանը մեզ է դիմել՝ տեղեկացնելով, որ այս տեղեկությունները չեն համապատասխանում իրականությանը, անհիմն են և արատավորում են իր պատիվն, արժանապատվությունն ու գործարար համբավը:
