Երկուշաբթի օրը սիրիական բանակի տանկերը ապստամբների կողմից վերահսկվող ամենախոշոր կենտրոնում՝ Համա քաղաքում, սկսել են ռազմական գործողություններ, որոնց նպատակը քաղաքի վերահսկողությունն իրենց ձեռքն առնելն է: Անցած ուրբաթ այստեղ տեղի էր ունեցել վերջին շրջանի ամենախոշոր հանրահավաքը, որը ցուցադրվել էր ամերիկյան CNN հեռուստաալիքով: Այս հեռուստաալիքի հեռարձակումը Սիրիայից թույլատրվել է երկու շաբաթ առաջ:
Սիրիայի իշխանությունները տանկեր և այլ ծանր զինտեխնիկա են մտցրել քաղաք, որի հետևանքով հաղորդվում է առնվազն երեք զոհի մասին: Մարդիկ փորձել են իրենց մարմիններով փակել տանկերի ճանապարհը՝ թույլ չտալով նրանց մուտքն այստեղ: Ինչպես հաղորդում է Reuters գործակալությունը՝ հղում անելով բժշկական շրջանակներին, զոհվածների մեջ է 13-ամյա մի տղա, որի դիակը մի տղամարդու դիակի հետ միասին գցել են Օրոնտես գետը:
Հայտնի է նաև, որ քաղաքն ամբողջությամբ շրջապատված է զինվորականների կողմից: Ավելի քան 250 մարդ ձերբակալվել է: Շրջափակումն սկսվել է այն բանից հետո, երբ մոտ 30 ավտոբուսներով այստեղ են բերվել զինվորականներ: