«Ես մտածում եմ, որ միայն այդ օրն եմ հաղթել, միայն այդ օրն եմ չեմպիոն եղել: Ես երկար ճանապարհ ունեմ անցնելու, և եթե շարունակեմ մտածել, որ չեմպիոն եմ, ու թե ինչ է ինձ տալիս իմ հաղթանակը, այլևս չեմ կարողանա հաղթել»,- այս մասին «Առաջին լրատվական»-ի հետ զրույցում ասաց 19-ամյա ըմբշամարտիկ, Եվրոպայի նորընծա չեմպիոն Արսեն Հարությունյանը: Հիշեցնենք՝ Ռումինիայի մայրաքաղաք Բուխարեստում անցկացված ազատ ոճի ըմբշամարտի Եվրոպայի առաջնությունում Հայաստանի միակ մեդալը նվաճեց Արսեն Հարությունյանը՝ 61 կգ քաշային կարգում չորս փառահեղ հաղթանակ տանելով։
«Հաջողվեց հաղթանակ տանել մարզիչներիս հետ աշխատանքի, նաև խորհուրդների շնորհիվ»,- նշեց Ա. Հարությունյանը՝ մանրամասնելով, որ կիրառել է հոգնեցնող մարտավարություն: Մարզիկի խոսքով՝ իր համար ամենադժվարը եղել է ռումինացու հետ գոտեմարտը, քանի որ նրա հայրենիքում է ընթացել մրցապայքարը, բացի դրանից՝ նա ևս իր ոճն էր կիրառում՝ հոգնեցնող մարտավարություն:
Անդրադառնալով թուրք մարզիկի հետ գոտեմարտին, Ա. Հարությունյանը նշեց. «Երբ ես մրցագորգին եմ, ինձ համար նշանակություն չունի հակառակորդս թուրք է, թե այլ ազգի ներկայացուցիչ: Եթե մրցման ժամանակ ես մտածեի, որ թուրք ըմբիշի դեմ եմ պայքարում և նրա հետ ուրիշ կերպ պիտի գոտեմարտեմ, չէի կարողանա ճիշտ դասավորել քայլերս: Գորգի վրա միայն մտածում եմ ճիշտ հնարքները ճիշտ պահին կիրառելու, հակառակորդից շուտ կողմնորոշվու մասին»:
Մանրամասն՝ տեսանյութում:
