Ապրում ենք անցումային մի ժամանակաշրջանում, երբ փշրվում են կարծրատիպեր, համակարգեր, և արվեստն ամենազգայուն ոլորտներից է, որն արձագանքում է ընթացող գործընթացներին: Թեմայի շուրջ «Առաջին լրատվական»-ի հետ զրույցում իր դիտարկումները ներկայացրեց կինոռեժիսոր Նիկոլայ Դավթյանը: Կինոյի մասին օրենքի նախագիծն իր վերջնարդյունքին չի հասնում: «Գուցե ցանկություն չկա, որ դա լինի: Իմ կարծիքով՝ խնդիրն ավելի գլոբալ է. մենք մինչև չունենանք մշակույթի զարգացման դոկտրին, ոչինչ չի օգնի: Մենք պետք է նպատակակետ ունենանք՝ ինչն ենք զարգացնում, ինչու… Պետք է հասկանանք՝ արվեստի ոլորտում դեպի ուր ենք գնում»:
Կինոռեժիսորի դիտարկմամբ՝ մշակութային զարգացման դոկտրին լինի, թե չլինի, հասարակությունը, միևնույն է, փոխվելու կարիք ունի. «Եվ քանի դեռ մշակույթի զարգացման դոկտրին չկա, արվեստ – հասարակություն կապը ցաքուցրիվ վիճակում է, չեն կարողանում կողմնորոշվել»:
Նիկոլայ Դավթյանն ընդգծեց, որ կինոն արվեստ լինելուց բացի՝ նաև հզորագույն եկամուտ կարող է ապահովել. «Կինոյով Ֆանտաստիկ փողեր կարելի է աշխատել»: Կինոռեժիսորի կարծիքով՝ անհրաժեշտ է, որ ֆիլմի վարձույթներ և մարզերում կինոթատրոններ լինեն:
Մանրամասն՝ տեսանյութում: