«Մշակութային քաղաքականություն Հայաստանում երբևէ չի եղել: Անընդհատ բարձրաձայնել եմ այն մասին, որ որևէ քաղաքական ուժ կամ կառույց չի բարձրացնում Հայաստանի քաղաքացի դաստիարակելու գաղափարը»,- այս մասին «Առաջին լրատվական»-ի հետ զրույցում ասաց մշակույթի վաստակավոր գործիչ Գագիկ Գինոսյանը՝ հավելելով, որ պետք է նախևառաջ վերլուծել և հասկանալ, թե, որպես պետականություն, ինչ մարտահրավերներ կարող են առաջանալ ՀՀ-ի առջև, ըստ այդմ՝ բանաձևել, թե ինչպիսի քաղաքացի պետք է դաստիարակել, որը կկարողանա այդ մարտահրավերներին լավագույնս դիմակայել, և թե որ մշակույթը կարող է ձևավորել այդպիսի քաղաքացու:
Մեր զրուցակցի խոսքով՝ ծիծաղելի է, որ մշակույթի նախարարը անկատար է համարում օրենքը, բայց հղում է կատարում հենց նույն օրենքին՝ աշխատանքից ազատելով Կ. Օրբելյանին: «Ինձ համար վիրավորական է, երբ որ ասում են, որ Կ. Օրբելյանն ազատվել է ըստ օրենքի… Նախևառաջ պետք է հասկանալ՝ ինչպիսի օրենք պետք է ընդունել, որը կնպաստի մշակույթի զարգացմանը… Մշակույթի զարգացման խնդիրը որևէ մեկի մտքով չի անցնում: Եթե օրենքը խոչընդոտում է մշակույթի զարգացմանը, խելամիտ կլինի վերանայել այդ օրենքը կամ գոնե լռել այդ մասին: Գեղարվեստական ղեկավարից բացի՝ տնօրեն նշանակելը նոնսենս է: Օրբելյանը կոպեկների կռիվ չի տալիս, այլ մտավախություն կա, որ տնօրենը ցանկացած պահի կարող է գեղարվեստական ղեկավարին աշխատանքից ազատել»,- նշեց Գինոսյանը:
Մշակույթի վաստակավոր գործիչը, անդրադառնալով միջադեպին, երբ վարչապետ Ն. Փաշինյանը, այցելելով մաքսատուն, անկյունում հայտնաբերել էր փոշոտ դրոշը, ինչը ցասումի և կտրուկ արձագանքի տեղիք էր տվել, նշեց, որ իր կարծիքով՝ տվյալ դեպքում խստությունը ճիշտ էր. «Ես էլ չէի կարողանա զսպել իմ վրդովմունքը: Մարդը պետք է հարգի իր ազգի սրբությունները՝ խորհրդանիշները՝ դրոշը, զինանշանը, օրհներգը»:
Մանրամասն՝ տեսանյութում: