ԱՄՆ-ի Օկլահոմա նահանգում մանկահասակ երեխայի լեզուն, որը 2 անգամ երկար էր բնական չափից, կարճացրել են վիրահատությամբ։ Բժիշկները հույս են հայտնել, որ միջամտությունից հետո երեխայի համար ավելի հեշտ կլինի շնչել, ուտել և խմել։
Daily Mail պարբերականի փոխանցմամբ, Բեյքեր Ռոթի մոտ հայտնաբերվել է Բեքվիթ-Վիդեմանի ախտանիշ, հազվադեպ գենետիկ անոմալիա, որի պատճառով օրգանիզմի տարբեր բաժիններ հղիության շրջանում անհամաչափ են զարգանում։ Այդ ախտանիշի պատճառով տղան ծնվել է հսկայական լեզվով, որը չէր տեղավորվում նրա բերանում և խանգարում էր բնականոն կյանքին։
«Ինձ միշտ հաճելի էր թվում, որ ուլտրաձայնային նկարներում նա լեզու էր ցույց տալիս,- պատմել է Ֆարա Ռոթը՝ նրա մայրը։- Բայց իրականում դա մակրոգլոսիա էր՝ Բեքվիթ-Վիդեմանի ախտանիշով պայմանավորված»։
Մասնագետները խորհուրդ են տվել չհապաղել լեզուն փոքրացնելու հարցում, այլապես այն կարող էր հանգեցնել ծնոտի ձևախեղման: Նրանց հաջողվել է մոտ երկու անգամ փոքրացնել երեխայի լեզուն։ Հիմա տղան մեկ տարեկան յոթ ամսական է, և ինչպես նշել է մայրը, նորից սովորում է խմել, ուտել և ճիշտ շփվել։
