Գերմանիայում սկանդալ է բարձրացել։ Այդ երկրի տրանսպորտի նախարարությանը մեղադրել են սեքսիզմի մեջ՝ հեծանվորդների սոցիալական գովազդի անվտանգության հետ կապված, գրում է The Guardian պարբերականը։
Նշվում է, որ քարոզարշավին մասնակից են դարձել մոդելները, որոնք կրում են միայն ներքնազգեստ և սաղավարտ։ Իսկ գովազդի կարգախոս է դարձել միտքը, որ սաղավարտը գրավիչ տեսք չունի, սակայն կարող է կյանքեր փրկել։
Գերմանիայի Սոցիալ-դեմոկրատական կուսակցության կանանց կոմիտեի նախագահ Մարիա Նոյխլը մի շարք մեղադրանքներ է հնչեցրել տրանսպորտի նախարար Անդրեաս Շոյերի հասցեին։ Նրա խոսքով՝ նախարարի գործողությունները «հիմար են» և «սեքսիստական»։
«Երբ տրանսպորտի նախարարը իր ծրագիրն առաջխաղացնում է մերկ մարմնի օգնությամբ, հիմարություն է և սեքսիզմ»,-ասել է Նոյխլը։
Իսկ ընտանիքի հարցերով նախարար Ֆրանցիսկա Գիֆին Facebook-ի իր էջում կոստյումով և հեծանվի հետ լուսանկար է հրապարակել։ «Սաղավարտը շատ գեղեցիկ է համադրվում կոստյումի հետ»,-մակագրել է նա լուսանկարը։
