Հունվարի 21-25- ը Ստրասբուրգում իր աշխատանքն է սկսել Եվրոպայի Խորհրդի Խորհրդարանական Վեհաժողովի այս տարվա առաջին նստաշրջանը: ԵԽԽՎ նստաշրջանի աշխատանքներին մասնակցելու համար Ստրասբուրգ է մեկնել ԱԺ ԵԽԽՎ նոր պատվիրակությունը՝ ողջ կազմով: Հայաստանյան պատվիրակության անդամ Էդմոն Մարուքյանն «Առաջին լրատվական»- ի հետ տեսազրույցում նշեց, որ հենց առաջին օրն այնտեղ քննարկվել են Հայաստանի արտահերթ խորհրդարանական ընտրությունների զեկույցը, նաև Վրաստանի նախագահական ընտրությունների զեկույցը: Ելույթներով հանդես են եկել Է. Մարուքյանը, Մ. Մելքումյանը և Ն. Զոհրաբյանը՝ ներկայացնելով իրենց մոտեցումները և կարծիքը:
Նախօրեին Է. Մարուքյանն իր ելույթում Ադրբեջանին մաղթել էր շուտափույթ թավշյա հեղափոխություն, և արձագանքը չի ուշացել: «Ադրբեջանի պատվիրակները նախապես գրանցվել էին, քանի որ Հայաստանի հարցն էր քննարկվելու, մի շարք ելույթներ եղան, որոնցում խոսում էին Հայաստանում ստեղծված իրավիճակի մասին՝ նշելով, որ քրեական ռեժիմներ են եղել, և հույս ունեն, որ այսուհետ իրենց համար էլ լավ կլինի: Ես պատասխան ելույթով հանդես եկա,- նշեց Է. Մարուքյանը:- Նրանք մշտապես պատրաստված տեքստեր ունեն, որոնք չեն փոխվում, խոսքը տարածքների գրավման մասին է, իբրև թե Հայաստանը ադրբեջանական հող է և այլ աբսուրդային և հիմար փաստարկներ են միշտ բերում, և մենք ժամանակ առ ժամանակ պատասխանում ենք այդ փաստարկներին: ԵԽԽՎ պատվիրակներն ուղղակի հոգնել են այդ դեբատներից, բայց չէինք կարող անպատասխան թողնել՝ որպես նոր պատվիրակություն»:
Է. Մարուքյանը նաև ընդգծեց, որ օրակարգը շատ ծանրաբեռնված է, ԵԽԽՎ-ում ամենակարևոր հարցը մնում է Ռուսաստանի մասնակցության հարցը: «Ռուսաստանի նկատմամբ կիրառված պատժամիջոցներից հետո Ռուսաստանը ԵԽԽՎ պատվիրակություն չի ուղարկում և չի վճարում իր անդամավճարի մի մեծ մասը, սա լուրջ ճգնաժամի առիթ է դարձել ԵԽԽՎ-ում, և եթե մինչև հունիս ՌԴ-ն չվճարի անդամավճարը, ԵԽ-ն, իր կանոնադրությունից ելնելով, կարող է ՌԴ-ին հանել անդամությունից»:
Մանրամասն՝ տեսանյութում: