7-րդ գումարման խորհրդարանի առաջին նստաշրջանն արդեն հնարավորություն է ընձեռում որոշակի տեսակետներ, կարծիքներ հայտնելու։ Ինչպե՞ս եք գնահատում նոր խորհրդարանի, որի գերակշիռ մասը երիտասարդ կադրեր են, երկրի գլխավոր հարթակ դառնալու պոտենցիալը «Առաջին լրատվական»-ի հարցին «Կառուցողական» կուսակցության նախագահ Անդրիաս Ղուկասյանը պատասխանեց․ «Մենք ունենք սերնդափոխություն, և պետք է այդ կադրային երևույթի դրական և բացասական կողմերը, այսպես ասած, վայելենք։ Դրականն այն է, որ կան նոր գաղափարներ, նոր մոտեցումներ, մարդիկ հնարավորություն ունեն ազատ ու անկաշկանդ գործելու ավելի, քան նախորդ խորհրդարաններում։ Իսկ փորձի տեսակետից պետք է նշեմ, որ այն ուժերը, որոնք ներկայացված են խորհրդարանում, ասենք, որ ունեն լուրջ քաղաքական պոտենցիալ, այդպես չէ։ Դա պետք է ստեղծվի ընթացքում։ Սակայն ես դրական եմ նայում, և գտնում եմ, որ մենք դրական արդյունք կունենանք»։
Իսկ ի՞նչը կարող է խանգարել, որպեսզի այդ պոտենցիալը չիրացվի «Առաջին լրատվական»-ի հարցին Անդրիաս Ղուկասյանը պատասխանեց․ «Հիմա դժվար է դեռևս դասավորվածությունը գնահատել և ասել, որ կան քաղաքական գործոններ, որոնք կարող են բարդույթներ ստեղծել ապագայում, բայց, իհարկե, կարևոր գործոն է իշխանության մոնոպոլիան, այսինքն՝ ինչը որ ունեցել ենք անցյալում, այդ երևույթը կարող է կրկնվել։ «Իմ քայլը» դաշինքի և «Քաղաքացիական պայմանագիր» կուսակցության մոտեցումներից է կախված, թե խորհրդարանը կգործի՞ իրապես որպես խորհրդարան։
Օրինակ, մենք տեսնում ենք, թե Բրիտանիայի խորհրդարանում հարցերն ինչպես են քննարկում։ Մենք այդպիսի աշխատանք տեսնելո՞ւ ենք մեր խորհրդարանում՝ կախված կլինի նրանից, թե իշխանության այդ մոնոպոլիայի գործոնը որքանով կազդի խորհրդարանի վրա»։
Ամբողջությամբ՝ տեսանյութում։
