7-րդ գումարման խորհրդարանն արդեն մեկ շաբաթ է՝ աշխատում է ինչպիսի՞ն են Ձեր առաջին տպավորությունները «Առաջին լրատվական»-ի հարցին քաղտեխնոլոգ Վիգեն Հակոբյանը պատասխանեց․ «Այն ուշադրությունը, որ կա խորհրդարանի նկատմամբ, շատ բնական է։ Դա առաջացել է այն գերսպասումներից, որոնք հենց իշխանությունն են, այսպես ասած, ձևավորել։ 7-8 ամիս առաջ, երբ կառավարությունն էր իր առաջին նիստերն անցկացնում, նույն ուշադրությունը կար։ Հետագայում, այսպես ասած, մասնագիտական շրջանակները շարունակում էին հետևել կառավարության աշխատանքներին, իսկ մնացածն արդեն զբաղված էին իրենց առօրյա գործունեությամբ։ Հիմա Ազգային ժողովն է։ Հետհեղափոխական առաջին Ազգային ժողովն է իր առաջին նիստերով, և, քանի որ գերսպասումներ են ձևավորված, ապա հետաքրքրությունը, գոնե առաջին նիստերի նկատմամբ, շատ մեծ է»։
«Շատերը կանխատեսում էին այն, ինչ մենք տեսնում ենք։ Այսինքն՝ Ազգային ժողովը բավականին բազմաշերտ է։ Կա մի շերտ, որն ինչպես հիմա ասում են՝ անփորձ երիտասարդներ են, որոնք երբևիցե պատկերացում չեն ունեցել, որ լինելու են Ազգային ժողովում՝ թեկուզ մեկ տարի առաջ։ Կա մի շերտ, որը որոշակի փորձ ունի, այսինքն՝ նրանց համար սա առաջին գումարման Ազգային ժողովը չէ, և կան մարդիկ, որոնք 1990-ականներին են եղել Ազգային ժողովում։ Այնպես որ, միանշանակ գնահատել, թե Ազգային ժողովում ինչ կոնտինգենտ է հավաքված, մենք չենք կարող, և առաջին շաբաթը ցույց տվեց, որ միանշանակ գնահատականներ չեն լինելու»,- հավելեց քաղտեխնոլոգը։
Ամբողջությամբ՝ տեսանյութում։