ՀՀԿ խմբակցության ղեկավար Գալուստ Սահակյանն այսօր խորհրդարանական ճեպազրույցների ժամանակ անդրադարձավ ՀՀԿ խմբակցության անդամ Սպարտակ Մելիքյանի և Վերահսկիչ պալատի նախագահ Իշխան Զաքարյանի միջև հակամարտությանը: Արդյո՞ք Մելիքյանի հայտարարությունը քննարկվել է ՀՀԿ–ում` հարցին Գալուստ Սահակյանը պատասխանեց. «Չեմ կարծում, որ պետք է քննարկվեր, որովհետև արդեն քննարկվեց, որ դատարանը պետք է քննի գործը։ Դա անձնական խնդիր է, և էդպես քաղաքական շահարկումների տեղիք պիտի որ չտար։ Ես այն կարծիքին եմ, որ ստուգող մարմիններն էլ կարող են անթերի չաշխատել, բայց նման ամբիոնից ամեն ինչը պետք է փաստարկված ներկայացվի։ Մենք բոլորս էլ կարող ենք կասկածել, բայց կասկածելով չես կարող գործընթացներ սկսել»։ Սահակյանը նշեց, որ Սպարտակ Մելիքյանն իրենց հետ կապված է այնքանով, որ ֆրակցիայի անդամներից մեկն է։ «Իհարկե, ֆրակցիոն գործողությունների ենթատեքստում սխալ է թույլ տրվել, որովհետև նման խնդիրները կարելի է քննարկել, հետևություններ անել և այնպես մատուցել, որպեսզի արդյունքներն առավել լինեն, բայց ես չեմ էլ տեսնում, որ Մելիքյանը ինչ-որ միտում է ունեցել, դա վերագրում եմ խորհրդարանականի անփորձությանը, որովհետև 2-3 տարի է պատգամավոր, և կարող է նաև այդպիսի զեղումներ լինեն, որն ինձ համար անընդունելի է»,- հայտարարեց Գալուստ Սահակյանը։