Ադրբեջանական Salam News գործակալության փոխանցմամբ, այսօր տեղի է ունեցել Թուրքիայի Ազգային մեծ ժողովի 14-րդ գումարման 1-ին նիստը։ Նիստի բացման արարողակարգի ժամանակ ավանդաբար ելույթ է ունեցել խորհրդարանի ամենատարեց պատգամավորը՝ գլխավոր ընդդիմադիր ուժ «Ժողովրդա-հանրապետական» կուսակցությունը (ԺՀԿ) ներկայացնող Օքթայ Էքշին։
Ուշագրավ է, որ նա ԺՀԿ միակ ներկայացուցիչն էր, քանի որ նրա մնացած անդամները բոյկոտել են խորհրդարանի աշխատանքը։
Ի դեպ, խորհրդարանի աշխատանքը բոյկոտել են նաև քուրդ անկախ պատգամավորները, ինչպես նախապես խոստացել էին։
Հիշեցնենք, որ ԺՀԿ-ն այդ քայլին է գնացել այն պատճառով, որ դեռևս բանտում են գտնվում «Էրգենեկոն» ահաբեկչական կազմակերպության գործով ձերբակալված իրենց նորընտիր պատգամավորներ Մեհմեթ Հաբերալն ու Մուսթաֆա Բալբայը։
Ի դեպ, ԺՀԿ-ն ունի 135 մանդատ, իսկ քուրդ անկախ թեկնածուները՝ 35 մանդատ։