ԱԺ առողջապահության, մայրության ու մանկության հարցերի հանձնաժողովը խորհրդարանում առողջապահության փոխնախարար Սերգեյ Խաչատրյանի հետ սկսել է քննարկել ՀՀԿ-ական Արման Սահակյանի, Սամվել Ֆարմանյանի և մի խումբ այլ ՀՀԿ-ականների հեղինակած՝ «Գովազդի մասին» օրենքում փոփոխությունը:
Հիշեցնենք, որ առողջապահության նախարարությունը բացասական եզրակացություն է տվել օրինագծին, սակայն վարչապետ Տիգրան Սարգսյանը կառավարության նախորդ նիստերից մեկում հանձնարարել էր կրկին վերանայել հեռուստատեսությամբ ալկոհոլի գովազդի թույլատրման հնարավորության մասին ՀՀԿ-ական պատգամավորների առաջարկները:
«Առաջարկում եմ ևս մեկ անգամ քննարկել նախագիծը օրենքի հեղինակների հետ, քանի որ վատ նախադեպ է, երբ կուսակիցները հանդես են գալիս օրենսդրական նախաձեռնություններով, իսկ կառավարությունը բացասական եզրակացություն է տալիս: Առաջարկում եմ մեկ անգամ ևս քննարկել և փոխադարձ ընդունելի որոշում գտնել»,- ասել էր Տիգրան Սարգսյանը:
Այսօր հրավիրած ասուլիսում առողջապահության նախարարը լրագրողի հարցին, թե ինչպիսի՞ն է նախարարության եզրակացությունը, առողջապահության նախարար Դերենիկ Դումանյանն ասաց, որ իր եզրակացությունը չի փոխվել. «Ես այդ որոշմանը բացասական եզրակացություն եմ տվել և կառավարության նիստին այդպես էլ ներկայացրել եմ: Վարչապետը հանձնարարեց, որ հեղինակների հետ մեկ անգամ ևս քննարկենք, և մենք այսօր քննարկելու ենք»:
«Առաջին լրատվական»-ի դիտարկմանը՝ վարչապետն ասել էր, որ ճիշտ չէ կուսակիցների առաջարկներն այդպես մերժելը, և փաստորեն ինքը վարչապետի խոսքը մերժում է, նախարարը հայտարարեց. «Նա այդպիսի բան չի ասել»:
Ըստ Դերենիկ Դումանյանի՝ «վարչապետը որևէ բան չի հայտարարել՝ բացի նրանից, որ ասել է՝ հեղինակների հետ ևս մեկ անգամ քննարկեք: Դա չի նշանակում, որ վարչապետը այդ որոշմանը կողմ է կամ դեմ: Նա ասել է, որ ձեր բացասական կարծիքը ևս մեկ անգամ հեղինակների հետ քննարկեք: …Բայց ես իմ բացասական կարծիքը չեմ փոխում: Մենք հայտարարում ենք առողջ ապրելակերպի տարի:
Ես համարում եմ, որ մենք պետք է բոլոր այս ուղղություններով միջոցառումները խստացնենք և ոչ թե թուլացնենք: Խոսքը վերաբերում է ծխախոտին, ալկոհոլի չարաշահմանը, նստակյաց կյանքին, ոչ առողջ սննդի կիրառմանը և այլն: Մենք այս բոլոր ուղղություններով աշխատանք ենք տանելու և հետևողական ենք լինելու, որ բոլոր օրենսդրական, ենթաօրենսդրական մակարդակներում որևէ մեղմացում չլինի»:
Նշենք, որ առողջապահության նախարար Դերենիկ Դումանյանն ընդգծել էր՝ կառավարությունը բացասական եզրակացություն է տվել, քանի որ փոփոխությունները պարունակում են էական ռիսկեր, որոնք ուղղակիորեն կապված են քաղաքացիների առողջության հետ…
Հիշեցնենք, որ փոփոխություններով առաջարկվում է ալկոհոլի գովազդի արգելքից անցնել մասնակի արգելքի՝ թույլատրել թունդ ոգելից խմիչքի գովազդ ժամը 22-ից 6-ը: Այսօրվա դրությամբ օրենքով արգելվում է հեռուստատեսությամբ թունդ (ավելի քան 20 տոկոս) ալկոհոլային խմիչքների գովազդը՝ բացառությամբ կոնյակի:
